اسلام آباد (مانیٹرنگ ڈیسک) اسلام آباد ہائی کورٹ نے توشہ خانہ ریفرنس میں پی ٹی آئی عمران خان کی نااہلی کیخلاف اپیل سماعت کے لیے منظور کرلی اور این اے95 میانوالی پر الیکشن کرانے سے روک دیا۔تفصیلات کے مطابق اسلام آباد ہائی کورٹ میں توشہ خانہ ریفرنس میں الیکشن کمیشن کے
فیصلے کے خلاف اپیل پر سماعت ہوئی۔نجی ٹی وی اے آروائی کے مطابق اسلام آباد ہائی کورٹ کے جسٹس عامرفاروق نے سماعت کی ، عمران خان کی جانب سے بیرسٹر علی ظفر اور علی گوہر عدالت میں پیش ہوئے۔عدالت نے عمران خان کی اپیل میں دستاویزات ریکارڈ کا حصہ بنانے کی متفرق درخواست منظور کرلی۔بیرسٹر علی ظفر نے کہا کہ الیکشن کمیشن نے درخواست گزار کو ڈی سیٹ کردیا ہے ، جس پر عدالت نے استفسار کیا درخواست گزار کو کس سیٹ سے ڈی سیٹ کیاگیا؟بیرسٹرعلی ظفر نے بتایا کہ درخواست گزار کو این اے 95 میانوالی سے ڈی سیٹ کیا گیا، عدالت نے مزید استفسار کیا کیا یہ ریفرنس اسپیکرقومی اسمبلی سے تریسٹھ 2 کے تحت آیا تھا؟وکیل کا کہنا تھا کہ اسپیکر قومی اسمبلی کی جانب سے ریفرنس آیا ،الیکشن کمیشن نے آرٹیکل63 پی کے تحت نااہلی کی۔عدالت نے استفسار کیا اگر اسپیکرکو پتہ لگے کہ ایک ممبر سزا یافتہ ہے تو کیا وہ خود ڈی سیٹ کرسکتاہے؟ کیا یہ ریفرنس اسپیکر نے خود بنایا یا کسی نے کوئی درخواست دی تھی؟ انہوں نےریفرنس میں کہا کہ صادق و امین نہیں رہے تو ہم ریفرنس بھیج رہےہیں۔بیرسٹر علی ظفر نے بتایا کہ الیکشن کمیشن نے صادق و امین کو نہیں دیکھا،الیکشن کمیشن نے کہا ہم کسی کو بھی الیکشن ایکٹ کے تحت نااہل کرسکتے۔
عدالت نے استفسار کیا کیا گوشوارے ہر ممبر اسمبلی سالانہ جمع کرتے ہیں؟ بیرسٹر علی ظفر نے بتایا کہ ہرسال ممبران اسمبلی ،سینیٹ ممبران کوگوشوارےجمع کرناہوتے ہیں۔پی ٹی آئی وکیل نے کہا کہ اگر کسی نے کوئی چیز بیچ دی تو اسے جمع کرنے یا بتانے کی ضرورت نہیں ،
اگر آپ گوشوارے جمع نہیں کرتے تو آپ کی رکنیت معطل ہوجاتی ہے۔عدالت نے الیکشن کمیشن کی جانب سے عمران خان کی نااہلی کیخلاف اپیل سماعت کیلئے منظور کرلی۔اسلام آباد ہائی کورٹ نے عمران خان کی اپیل پر فریقین کو نوٹسز جاری کرتے ہوئے جواب طلب کرلیا اور الیکشن کمیشن کو این اے 95 میانوالی پر الیکشن کرانے سے روک دیا۔بعد ازاں عدالت نے کیس کی سماعت 10 نومبر تک ملتوی کردی۔
