لاہور( این این آئی) نجی شعبے کے زیر انتظام چلنے والی تھل ایکسپریس کا ٹکٹنگ سسٹم ہیک ہونے کا کیس ایف آئی اے کو بھیجا جائے گا۔تفصیلات کے مطابق پاکستان ریلوے کی آئوٹ سورس تھل ایکسپریس کا ٹکٹنگ سسٹم ہیک ہو گیا اورمسافروں کو جاری ٹکٹس پر غیر اخلاقی اور نازیبا الفاظ پرنٹ ہو گئے تھے۔تھل ایکسپریس کے آئی ٹی منیجر نے ڈی ایس ریلوے کو درخواست میں انکشاف کیا کہ ٹکٹنگ سسٹم ہیک کیا گیا تھا۔ایس پی ریلوے کے مطابق مقدمہ ریلوے پولیس کی جانب سے درج کیا گیا ہے تاہم یہ سائبر کرائم ہے اس لیے معاملہ ایف آئی اے کو بھیجیں گے۔30 ستمبر کو نجی کمپنی نے جب ٹکٹس جاری کیے تو اس پر نازیبا الفاظ پرنٹ ہو گئے۔آئی ٹی مینیجر کی درخواست پر نامعلوم افراد کے خلاف مقدمہ درج کر لیا گیا۔