اسلام آباد (مانیٹرنگ ڈیسک /این این آئی)لندن میں پاکستان مسلم لیگ کی سینئر رہنما و وزیر اطلاعات و نشریات مریم اور نگزیب کو ہراساں کرنے کے معاملے پر وزارت داخلہ نے ملوث افراد کیخلاف کارروائی تیز کر دی ہے ،ذرائع نے بتایا کہ وزارت داخلہ نے ہراسگی میں ملوث 14 پاکستانیوں کا ڈیٹا حاصل کرلیا ہے ۔ ان میں 10 مرد اور4 خواتین شامل ہیں ،

ہراساں کرنے والوں کی شہریت کے حوالے سے بھی تمام تفصیلات حاصل کر لی گئیں ہیں،ذرائع نے بتایا کہ وزارت داخلہ نے واقعہ میں ملوث افراد کے پاکستان سے جاری تمام کریکٹر سرٹیفکیٹ منسوخ کرنے کا فیصلہ کیا ہے ،کریکٹر سرٹیفکیٹ وزارت داخلہ اور مختلف پولیس افسران کی جانب سے جاری کئے گئے تھے ،ذرائع نے مزید بتایا کہ وزارت داخلہ ان تمام معلومات کو کابینہ میں پیش کرے گی جس کے بعد ان افراد کا نائیکوپ اور پاسپورٹ منسوخ کرنے پر غور کیا جارہا ہے ۔ذرائع کے مطابق ان افراد کے پاکستان سے جاری تمام کریکٹرسرٹیفکیٹ منسوخ کرنے کا فیصلہ کیا گیا ہے،کریکٹر سرٹیفکیٹ وزارت داخلہ اور مختلف پولیس افسران کی جانب سے جاری کیے گئے۔ دوسری جانب مسلم لیگ (ن) نے لندن میں وفاقی وزیر مریم اورنگزیب کے ساتھ تحریک انصاف کے کارکنان کی جانب سے ہونے والے واقعہ سے متعلق مذمتی قرارداد پنجاب اسمبلی میں جمع کروادی۔مسلم لیگ (ن) کی رکن اسمبلی کنول لیاقت ایڈووکیٹ نے جمع کروائی گئی قرارداد کے متن میں کہاگیاکہ تحریک انصاف کے کارکنان کی جانب سے کئے جانے والے ناروا سلوک کی وجہ سے پوری دنیا میں پاکستان کا امیج متاثر ہوا ہے۔پی ٹی آئی کارکنان کے بدتمیزی کے بڑھتے واقعات تحریک انصاف کی چھوٹی سوچ اور عدم برداشت کی تربیت کی عکاسی کرتے ہیں۔قرار دادمیں وفاقی حکومت سے مطالبہ کیاگیا کہ تحریک انصاف کے ذمہ دار کارکنان کے خلاف قانونی کاروائی کی جائے اوربدتمیزی کرنے والوں کی پاکستانی شہریت کو ختم کرتے ہوئے

پاکستان داخلے پر پابندی عائد کی جائے۔دوسری جانب وزیراعظم شہباز شریف نے وفاقی وزیر اطلاعات مریم اورنگزیب کے ساتھ لندن میں پاکستان تحریک انصاف کے کارکنوں کی جانب سے کی گئی بدتمیزی پر ردعمل کا اظہار کرتے ہوئے کہا ہے کہ

مریم اورنگزیب نے اپنے عمل سے ہراساں کرنے والوں اور ان کے سپورٹر زکا مکروہ چہرہ بے نقاب کیاٹوئٹر پر جاری بیان میں وزیر اعظم شہباز شریف نے کہا کہ مریم اورنگزیب نے پی ٹی آئی کارکنوں کے ہراساں کرنے پر جس ظرف کا مظاہرہ کیا وہ قابل فخر ہے۔

شہباز شریف نے اپنی ٹوئٹ میں لکھا کہ مریم اورنگزیب نے اپنے عمل سے ہراساں کرنے والوں اور ان کے سپورٹر زکا مکروہ چہرہ بے نقاب کیا۔