راولپنڈی(این این آئی)لاہور ہائی کورٹ کے راولپنڈی بینچ نے وی لاگر جنرل (ر)امجد شعیب کو حکومتی وفد پر اسرائیلی وفد سے ملاقات کا الزام لگانے پر نوٹس جاری کردیا۔نجی ٹی وی کے مطابق وزیراعظم شہباز شریف کے دورہ قطر کے دوران

حکومتی وفد کی اسرائیلی وفد سے مبینہ ملاقات کے الزام کے خلاف پٹیشن کی سماعت ہوئی، جس میں عدالت نے لیفٹیننٹ جنرل (ر)امجد شعیب سے جواب طلب کرلیا۔ عدالت نے پیمرا اور پی ٹی اے کے علاوہ وزارت ٹیکنالوجی کو بھی نوٹس ارسال کردئیے۔دوران سماعت عدالت نے استفسار کیا کہ سوشل میڈیا سے متعلق قوانین ہیں یا نہیں؟اگر نہیں تو عدالت اس پر فیصلہ دے گی۔ جسٹس جواد الحسن نے ریمارکس دیے کہ آزادی اظہارِ رائے اجازت ہے مگر اس کی حدود و قیود ہیں، عدالت میں پٹیشن پیپلز لائرز فورم کے رہنما منصور ریاض ایڈووکیٹ نے دائر کی تھی، جس میں مقف اختیار کیا گیا تھا کہ وی لاگر نے حکومتی وفد پر اسرائیلی وفد سے ملاقات کا جھوٹا الزام عائد کیا۔پٹشنر کی درخواست میں استدعا کی گئی ہے کہ وی لاگر کے پاس اگر کوئی ثبوت ہیں تو پیش کرے وگرنہ اس کے خلاف قانونی ایکشن لیا جائے۔ عدالت نے فریقین کو نوٹس جاری کرتے ہوئے کیس کی سماعت 14 ستمبر تک ملتوی کر دی۔