اسلام آباد (مانیٹرنگ ڈیسک/این این آئی )پاکستان تحریک انصاف کے رہنما فواد چوہدری نے کہا ہے کہ آئی ایس پی آر نے اوور ری ایکٹ کیا، عمران خان نے جرنیلوں کا نام نہیں لیا۔ پاکستان تحریک انصاف کے رہنما فواد چودھری نے کہا ہے کہ عمران خان کی

تقریر دکھانے سے کون سی قیامت آئے گی۔ایک انٹرویومیں انہوں نے حکومت پر تنقید کرتے ہوئے کہا کہ ان کی اوقات یہ رہ گئی ہے یہ باہر بیٹھ کر برگر نہیں کھا سکتے،لوگ ان کو بیٹھنے نہیں دے رہے۔فواد چودھری نے کہا کہ ہمارے ہمسائے میں آئی ٹی کاانقلاب آ رہا ہے،آپ پاکستان کو کہاں لیکر جانا چاہتے ہیں؟عدالتوں میں ہمارے خلاف سیاسی کیسز چل رہے ہیں، ان کے عدالتوں میں کرپشن کے کیسز چل رہے ہیں۔پی ٹی آئی رہنما نے کہا کہ پاکستان میں ادارے قانون کے مطابق نہیں چل رہے، ہمارے یہاں ادارے شخصیات پر چل رہے ہیں، شخصیات فیصلہ کرتی ہیں کہ قانون کیا ہے۔انہوں نے کہا کہ عدالت اورفوج کو متنازعہ نہیں بنانا چاہئے،سیاسی جماعتیں مل بیٹھ کر مشترکہ جوڈیشری ریفامز پر بات کریں۔انہوںنے کہاکہ نواز شریف پاکستان کے عدالتوں سے مفرور ہیں،جن کے پاس 84ممبر ہیں وہ وزیراعظم بن کر بیٹھا ہوا ہے،جن کے پاس155ممبر ہیں وہ باہر بیٹھ کر اپوزیشن کر رہا ہے۔فواد چودھری نے کہا کہ ملک میں اس وقت مہنگائی سے حالات بہت خراب ہیں،ہمارا فوج اور جوڈیشری سے کوئی جھگڑا نہیں ہے، پاکستان کے عوام اور اداروں میں تفریق کسی کے مفاد میں نہیں۔انہوں نے کہا کہ عوام اس وقت عمران خان کے ساتھ کھڑے ہیں،ہم چاہتے ہیں عوام اور اداروں میں کوئی تفریق نہ ہو۔