اسلام آباد (این این آئی)ملک بھر میںگزشتہ 24 گھنٹوں کے دوران سیلاب اور بارشوں کے باعث مزید 57 افراد زندگی کی بازی ہار گئے ۔نیشنل ڈیزاسٹر مینجمنٹ اتھارٹی (این ڈی ایم اے) کی جانب سے جاری اعداد و شمار کے مطابق گزشتہ 24 گھنٹوں کے دوران سندھ میں

38 افراد جاں بحق ہوئے جبکہ خیبر پختونخوا میں 17 اموات ریکارڈ کی گئیں، اس کے علاوہ کشمیر اور بلوچستان میں ایک ایک ہلاکت رپورٹ ہوئی۔این ڈی ایم اے کے مطابق 24گھنٹوں میں مزید 57 افراد زندگی کی بازی ہار گئے جس کے بعد ملک بھر میں اموات کی مجموعی تعداد 1265 ہو گئی ہے ،زخمی افراد کی کل تعداد 7683 ریکارڈ ہو گئی ہے۔این ڈی ایم اے کے مطابق بارشوں اور سیلاب سے 24 گھنٹوں میں 22 مرد، 18 خواتین اور 17 بچے جاں بحق ہوئے ہیں۔نیشنل ڈیزاسٹر مینجمنٹ اتھارٹی نے صوبوں کی مناسبت سے اعداد و شمار جاری کرتے ہوئے بتایا کہ صوبہ سندھ میں بارشوں اور سیلاب سے 470 افراد جاں بحق اور 7204 افراد زخمی ہوئے جبکہ خیبرپختونخوا میں اب تک اموات کی تعداد 285 ہے۔دوسری جانب صدر مملکت ڈاکٹر عارف علوی نے کہا ہے کہ سیاست اور سیلاب کی یہ صورتحال ختم نہیں ہوئی۔ اتوار کو اپنے ایک ٹویٹ میں صدر مملکت نے کہا کہ عوام کو موبلائیز کر کے ، بحالی کی سرگرمیوں کو ترجیحی دیکر انسان دوستی کے ردعمل کی حوصلہ افزائی ، قومی معیشت کی تعمیر نو و بحالی اور قومی ڈائیلاگ ذریعے جمہوریت کو مضبوط کرنے کے آئینی کوششوں کو جاری رکھتے ہوئے سیاستدان قوم و ملک کی بہترین خدمت سرانجام دے سکتے ہیں۔