اسلام آباد(این این آئی)دنیا بھر میں سب سے زیادہ استعمال کیے جانے والے سرچ انجن گوگل کی جانب سے پاکستانی سیلاب متاثرین کے لیے 5 لاکھ ڈالر امداد دینے کا اعلان کیا ہے۔میڈیا رپورٹ کے مطابق گوگل ملازمین نے بھی پاکستانی سیلاب متاثرین کے لیے 7 کروڑ 20 لاکھ روپے کے عطیات دیے ہیں۔دوسری جانب گوگل جنوبی ایشیا ء کی نائب صدر اسٹیفنی ڈیوس نے اپنے ایک بیان میں کہا ہے کہ پاکستان میں سیلاب سے متاثرہ ہر فرد سے گہری ہمدردی ہے، پاکستان کے سیلاب متاثرین کو 11 کروڑ روپے کے عطیات دیے جائیں گے۔اسٹیفنی ڈیوس نے کہا ہے کہ پاکستان میں سب کو سیلاب متاثرین کی مدد کے لیے آگے بڑھتے دیکھا، ہم پاکستانیوں کے جذبے سے متاثر ہوئے ہیں اور ہم بھی مدد کرنا چاہتے ہیں۔اسٹیفنی ڈیوس نے کہاکہ گوگل کمپنی دیگر وسائل سے بھی پاکستانی سیلاب متاثرین کی مدد کرے گی۔