اسلام آباد(این این آئی)وفاقی وزیر داخلہ رانا ثنااللہ نے کہاہے کہ ایجنسیوں کی رپورٹ میں سامنے آیا ہے کہ شہباز گل کا بیان انفرادی عمل نہیں تھا،
اگر حکومت نے فیصلہ کرلیا تو عمران خان کو گرفتار کرلیں گے۔نجی ٹی وی کو انٹرویو دیتے ہوئے رانا ثنااللہ نے کہاکہ شہبازگل کی مہم جوئی انفرادی عمل نہیں ایک جماعتی عمل تھا، پی ٹی آئی کا سوشل میڈیا ونگ اس کے پیچھے تھا، شہباز گل نے تفتیش میں بتایا کہ لکھا ہوا بیان تھا۔
وزیرداخلہ نے کہاکہ اگر حکومت نے فیصلہ کرلیا تو عمران خان کو گرفتار کرلیں گے، عمران خان کی گرفتاری کی صورت میں جویہ باتیں کر رہے ہیں ایسا کچھ نہیں ہوگا۔
وفاقی وزیر نے کہاکہ شہدا کے خلاف ٹرینڈ چلائے گئے کیا اس کی پی ٹی آئی نے مذمت کی؟ شہدا کے خلاف مہم جوئی کرنے والے پی ٹی آئی کے لوگ ہیں۔
انہوں نے کہاکہ پنجاب میں پی ٹی آئی کی نہیں ق لیگ اورسب سے بڑے ڈاکو کی حکومت ہے، پنجاب حکومت اس شکل میں جاری نہیں رہ سکتی،
اندرون خانہ جو کہانیاں ہم سن رہے ہیں وہ بڑی عجیب ہیں، پی ٹی آئی اور ق لیگ کے درمیان نہ معاملہ چل رہا ہے اور نہ آگے چل سکتا ہے۔
