لاہور (این این آئی)نجی ٹی وی جیو نیوز کے پروگرام میں وفاقی وزیر داخلہ رانا ثنا اللہ کا کہنا ہےکہ گلوکار سلمان احمد کے پاس عمران خان کی جان کو خطرے کے حوالے سے اطلاع ہے تو ہمیں دیں ورنہ غلط اطلاع دینے پر مقدمہ درج کرکے انہیں گرفتار کیا جاسکتا ہے۔
نجی ٹی وی جیو نیوز کے پروگرام میں وفاقی وزیر داخلہ رانا ثنااللہ نے کہا ہے کہ گلوکار سلمان احمد کی جانب سے عمران خان کی جان کو خطرے کے بیان پر کہا کہ دانستہ طور پر معاشرے میں افراتفری پھیلانا جرم ہے، اگر سلمان احمد نے افراتفری پھیلانےکے لیے یہ بات کہی ہے تو یہ جرم ہے اور اگر واقعی کوئی اطلاع ہے تو ہمیں بتائیں نہیں تو عدالت سے رجوع کریں۔دوسری جانب وفاقی وزیر داخلہ رانا ثناء اللہ کی اہلیہ نے کہا ہے کہ ہم اللہ کے گھر سے ہو کر آئے ہیں، وہاں بھی ہم نے شہباز گل کے لیے دعا کی ہے۔لاہور سے جاری بیان میں رانا ثناء اللہ کی اہلیہ نے کہا کہ رانا ثناء پر تشدد کروانے والوں میں شہباز گل بھی شامل تھے لیکن ہم کسی پر تشدد کے حق میں نہیں، پی ٹی آئی رہنما پر تشدد ہوا بھی نہیں ہے۔انہوں نے کہا کہ پی ٹی آئی کے دور حکومت میں رانا ثناء اللہ کی حوالات میں چینی پھینک دی جاتی تھی، شوہر پر تشدد ہوتا تھا تو وہ گھر آکر بتاتے نہیں تھے لیکن ہمیں محسوس ہوجاتا تھا۔وفاقی وزیر داخلہ کی اہلیہ نے کہا کہ میرے شوہر نے شہباز گل پر تشدد نہیں کروایا، یہ اپنے کیے کی سزا بھگت رہے ہیں۔انہوںنے کہاکہ میں سمجھتی ہوں کہ شہباز گل پر تشدد نہیں ہونا چاہیے، دراصل پی ٹی آئی رہنما کو ان کا اپنا خوف پریشان کر رہا ہے۔
