اسلام آباد (این این آئی)10 بلین ٹری سونامی منصوبے کا دوبارہ سے آغاز ،چیئرمین پاکستان تحریک انصاف عمران خان نے پودا لگا کر شجرکاری مہم کا افتتاح کر دیا۔موسم برسات میں پنجاب اور خیبر پختونخوا میں 10 کروڑ پودے لگائے جائیں گے،
جشن آزادی کے موقع پر 14 لاکھ پودے لگائے گئے،شجرکاری مہم کے حوالے سے چیئرمین تحریک انصاف عمران خان نے عوام کے نام خصوصی پیغام دیا جس میں کہاگیاکہ رواں سال پاکستان پر موسمیاتی تبدیلی کے بڑے منفی اثرات پڑے ہیں۔ انہوںنے کہاکہ مارچ اور اپریل کے مہینوں کے دوران پاکستان میں دنیا کے مقابلے سب سے زیادہ گرمی پڑی،گرمی کی شدت کی وجہ سے پاکستان کے جنگلات میں آگ لگنے کے واقعات بڑھے۔انہوںنے کہاکہ اس سال پاکستان میں بارشیں وقت سے پہلے آگئیں اور سیلابوں کا موجب بنیں،موسمیاتی تبدیلی کی بدولت شمالی علاقہ جات میں تین جگہ گلیشئرز ٹوٹ چکے تھے۔انہوںنے کہاکہ گلیشئرز ٹوٹنے کی وجہ سے سیلاب آئے اور علاقوں میں شدید تباہی رونما ہوئی، قوم کو کہتا ہوں کہ اپنے بچوں کے بہتر مستقبل کے لیے درخت لگانا ہماری قومی ذمہ داری ہے۔انہوںنے کہاکہ اس سیزن میں خیبر پختونخوا اور پنجاب میں ہم 10،10 کروڑ درخت لگائیں گے۔انہوںنے کہاکہ عوام سے اپیل ہے کہ ہماری شجرکاری مہم میں پوری طرح شرکت کریں۔
