اسلام آباد (این این آئی) اسلام آباد پولیس نے کہاہے کہ ملزم شہباز گل کو عدالت کے حکم پر ڈاکٹرز کے بورڈ کے پاس لے جا کر طبی معائنہ کروایا۔ ترجمان اسلام آباد پولیس کے مطابق ڈاکٹرز کی رپورٹ کے مطابق ملزم کے جسم پر تشدد کا کوئی نشان نہیں ہے۔انہوںنے کہاکہ جیسا کہ تصاویر میں نظر آرہا ہے ملزم بالکل ہشاش بشاش اور جسمانی طور پر فٹ ہے،دوران تفتیش ملزم کے حقوق کا مکمل خیال رکھا گیا ہے۔
انہوںنے کہاکہ پولیس جسمانی ریمانڈ کے دوران قانون کے مطابق تفتیش کرتی ہے اور کسی قسم کا تشدد نہیں کیا جاتا۔ ترجمان نے بتایاکہ ملزم پر تشدد کے متعلق سوشل میڈیا پر ایک جھوٹا پروپیگینڈا کیا جارہا ہے،پولیس کی تفتیش تمام حالات و شواہد کو مدنظر رکھ کرکی جارہی ہے،تفتیش کو شواہد کی روشنی میں میرٹ پر یکسو کیا جائے گا۔اسلام آباد پولیس نے بتایاکہ پولیس ریکارڈ عدالت کی معاونت کے لئے ہوتا ہے جو عوام میں شئیر نہیں کیا جاسکتا،فرار ملزمان کی گرفتاری کیلئے کوشش کی جاری ہے۔اسلام آباد پولیس نے کہا کہ اگر ملزم بے گناہ ہے اور فون میں کوئی مواد موجود نہ ہے تو انہیں پولیس کے ساتھ تعاون کرنا چاہیے۔ اسلام آباد پولیس نے بتایاکہ جھوٹی ہمدردی حاصل کرنے کے لیے ملزمان کی جانب سے پراپیگنڈہ کیا جا رہا ہے۔انہوںنے کہاکہ پولیس اس کیس سے منسلک تمام افراد کو قانون کے مطابق تفتیش میں شامل کرے گی،تفتیش کی تفصیلات پولیس فائل کا حصہ ہیں اور معزز عدالت کے سامنے پیش کی جائیں گی۔انہوںنے کہاکہ تفتیش کے دوران بے شمار انکشافات سامنے آئے ہیں۔انہوںنے کہاکہ جن لوگوں کا کردار تفتیش کے دوران سامنے آئے گا ان کو بھی شامل تفتیش کیا جاسکتا ہے۔انہوںنے کہاکہ پراپیگنڈہ مہم اسلام آباد کیپیٹل پولیس کے تشخص کو متاثر کرنے کی کوشش ہے۔ انہوںنے کہاکہ عوام سے گزارش ہے کہ پراپیگنڈہ پر کان نہ دھریں۔
