برمنگھم (این این آئی)برمنگھم میں جاری کامن ویلتھ گیمز 2022 میں گزشتہ روز پاکستان نے ریسلرز کی بدولت مزید تین میڈلز جیت لیے، انعام بٹ اور زمان انور نے سلور میڈلز جبکہ عنایت اللّٰہ نے برانز میڈل جیتا۔کامن ویلتھ گیمز ریسلنگ کے مقابلوں میں گزشتہ روز پاکستان کے

تین ریسلرز ایکشن میں تھے، 65 کلو گرام کیٹیگری میں پاکستان کے عنایت اللّٰہ نے ابتدائی دو باؤٹس جیتیں مگر سیمی فائنل میں ان کو شکست ہوئی تاہم برانز میڈل کی باؤٹ میں اْنہوں نے اسکاٹ لینڈ کے ریلسر کو شکست دے کر کانسی کا تمغہ حاصل کر لیا۔86 کلو گرام کیٹیگری میں پاکستان کے انعام بٹ نے ابتدائی تین باوٹس جیت کر فائنل کے لیے کوالیفائی کیا جہاں ان کا مقابلہ بھارت کے دیپک پونیا سے تھا، انعام کے خلاف دیپک تین صفر سے کامیاب رہے جبکہ پاکستانی ریسلر کو سلور میڈل پر اکتفا کرنا پڑا۔125 کلوگرام کی ویٹ کیٹیگری میں زمان انور کو فائنل میں کینیڈا کے امرویر سنگھ نے شکست دی۔کامن ویلتھ گیمز میں ریسلرز کے تین میڈلز کے بعد پاکستان کے مجموعی تمغوں کی تعداد پانچ ہوگئی جس میں ایک گولڈ، دو سلور اور دو برانز میڈل شامل ہیں۔دوسری جانب برمنگھم میں جاری کامن ویلتھ گیمز میں برانز میڈل جیتنے والے پاکستان کے عنایت اللّٰہ نے کہا ہے کہ ہماری سہولیات کم ہیں، ٹریننگ پارٹنر بھی اس معیار کے نہیں، فیڈریشن کے پاس اتنا بجٹ نہیں ہوتا کہ ہمیں باہر بھیجا جائے۔عنایت اللّٰہ نے ایک انٹرویو میں کہا کہ شکر ہے کہ برانز میڈل ملا، ریسلنگ فیڈریشن نے چھ ماہ کا کیمپ لگایا۔

موضوعات:کامن ویلتھ گیمز