اسلام آباد (این این آئی)ممنوعہ فنڈنگ اور جعلی بیان حلفی جمع کروانے کے معاملے پر چیئرمین پاکستان تحریک انصاف عمران خان کی نا اہلی کیلئے الیکشن کمیشن میں درخواست دائر کردی گئی۔درخواست امن ترقی پارٹی کے چیئرمین محمد فائق شاہ کی جانب سے

دائرکی گئی ہے۔درخواست میں کہا گیا کہ جھوٹا بیان حلفی جمع کروانے پر عمران خان کو 62 ون ایف کے تحت نا اہل کیا جائے، عمران خان سے بطور ایم این اے اور وزیراعظم حاصل مراعات اور سہولیات واپس لی جائیں۔درخواست میں کہا گیا کہ فیصل واوڈا کے کیس میں بھی جھوٹا بیان حلفی جمع کروانے پر انہیں نا اہل کیا گیا، نا اہلی کے ساتھ فیصل واوڈا کو تمام مراعات قومی خزانے میں جمع کروانے کا حکم دیا گیا تھا۔درخواست میں عمران خان کو پارٹی چیئرمین شپ سے بھی ہٹانے کی استدعا کی گئی ہے۔خیال رہے کہ الیکشن کمیشن نے 8 سال بعد پاکستان تحریک انصاف کی ممنوعہ فارن فنڈنگ کیس کا فیصلہ سنادیا ہے۔الیکشن کمیشن کے مطابق پی ٹی آئی نے ممنوعہ فنڈنگ لی، ممنوعہ فنڈنگ ثابت ہونے پر پی ٹی آئی کو شوکاز نوٹس بھی جاری کر دیا گیا ہے، فیصلے میں کہا گیا کہ کیوں نہ ان کے ممنوعہ فنڈز ضبط کیے جائیں، الیکشن کمیشن دفتر قانون کے مطابق باقی کارروائی بھی شروع کرے۔