اسلام آباد(این این آئی) جماعت اسلامی کے سینئر رہنما محمد شفیق عباسی نے آج پیر کو اسلام آباد میں اپنے برادری، دوست اور احباب سمیت پیپلز پارٹی میں شمولیت اختیار کی۔ پاکستان پیپلز پارٹی کے مرکزی سیکرٹری اطلاعات فیصل کریم کنڈی کی موجودگی میں انہوں نے وفاقی وزیر برائے سمندر پار پاکستانیز و ترقی انسانی وسائل ساجد حسین طوری سے تفصیلی ملاقات کی

اور پارٹی میں شمولیت کا اعلان کیا۔اس موقع پر پیپلز پارٹی خیبرپختونخوا کے سیکرٹری جنرل محمد شجاع اور ضلع مانسہرہ کے صدر ملک فاروق بھی موجود تھے۔اس موقع پر فیصل کریم کنڈی نے کہا کہ پیپلز پارٹی کی فیملی میں شامل ہونے پر وہ محمد شفیق عباسی اور دوستوں کو مبارکباد پیش کرتے ہیں اور نئے آنے والے ساتھیوں کو خوشامدید کہتے ہیں۔ انہوں نے کہا کہ پاکستان پیپلز پارٹی ایک جمہوری جماعت ہے اور ہر کارکن کو بلا تفریق اظہار رائے اور مخالفت کی آزادی ہے۔ انہوں نے کہا کہ پارٹی پاکستان کی واحد جماعت ہے جہاں کسی بھی بنیاد پر کسی کو کوئی تفریق اور فوقیت حاصل نہیں۔ وفاقی وزیر ساجد حسین طوری نے محمد شفیق عباسی اور انکے ساتھیوں کو پیپلز پارٹی میں شمولیت پر مبارکباد دیتے ہوئے کہا کہ یہ پارٹی کی قیادت کی بے لوث خدمات اور پارٹی پالیسی پر عوام کے اعتماد کا اظہار ہے کیونکہ پیپلز پارٹی نے ہمیشہ مشکل وقت میں ملک کی باگ ڈور سنبھالی ہے اور ملک کو مشکلات سے نکالنے میں اہم کردار ادا کیا ہے۔واضح رہے کہ محمد شفیق عباسی جماعت اسلامی گلیات کے امیر، ضلع ایبٹ آباد کے نائب امیر اور اسلام آباد شوریٰ کے رکن رہ چکے ہیں اور گزشتہ چالیس سال سے جماعت اسلامی سے وابستہ ہیں۔ انہوں نے کہا کہ آصف علی زرداری کی دانشمندی، وڑن اور مفاہمت کی پالیسی ہی ملک کو موجودہ مشکلات سے نکال سکتی ہے۔ انہوں نے کہا کہ پیپلز پارٹی وفاق کی علامت ہے۔ محمد شفیق عباسی نے کہا کہ بلاول بھٹو زرداری پاکستان کے نوجوانوں کے لیے مشعل راہ ہیں اور انکی قیادت میں وہ انشائ اللہ اپنے علاقے اور ملک و قوم کی خدمت کرینگے۔