اسلام آباد (این این آئی)حکومت کی جانب سے آرڈیننس کے ذریعے قومی اثاثوں کی اونے پونے داموں فروخت کا معاملہ،پاکستان تحریک انصاف نے معاملہ ایوان بالا میں اٹھا دیا۔
جمعہ کو تحریک التواء سینٹ کے قاعدہ نمبر 58 کے تحت جمع کروا دی گئی،تحریک التواء سینیٹر اعجاز چوہدری،سینیٹر شبلی فراز،سینیٹر سیف اللہ نیازی،سینٹر ڈاکٹر زرقا تیمور،اور دیگر کی جانب سے جمع کروائی گئی،تحریک التوا کے ذریعے ایوان کی کارروائی معطل کروانے اور معاملے پر بحث کی التجا کی گئی،
تحریک التوا کے متن میں موقف اختیار کیا گیا کہ کابینہ نے قومی اثاثوں سے متعلق ایک آرڈیننس پاس کرنے کے لئے تیار کیا ہے۔
متن تحریک التوا کے مطابق قومی اثاثوں کو سستے داموں فروخت کرنے کا فیصلہ کیا ہے،پاکستان پٹرولیم لمیٹڈ،او جی ڈی سی لمیٹڈ،
ماڑی پٹرولیم لمیٹڈ سمیت تمام تیل کے ذخائر محض دو ارب ڈالرز میں فروخت کرنے کا طے کیا ہے۔ تحریک التواء میں کہاگیاکہ اس معاہدے کو آئی ایم ایف پروگرام کا حصہ بنا دیا گیا،
اسکو عدالتی کاروائی سے بھی استثنیٰ حاصل ہوگا،حکومت اس معاہدے کی مکمل تفصیلات سے ایوان کو آگاہ کرے۔
