لاہور (آن لائن) مسلم لیگ ن کے مرکزی رہنما حمزہ شہباز شریف نے عدالتی فیصلے کو متنازعہ اور عوام کے ووٹوں سے منتخب حکومت پر شب خون قرار دیا ہے۔اپنے ردعمل میں انہوں نے کہا ہے کہ فل کورٹ کی استدعا کو نامنظور کر کے انصاف کے
تقاضے پورے نہیں کئے گئے۔جسٹس منیر اور مولوی مشتاق کی بدروحیں آج بھی عوام کی امنگوں پر ڈاکے ڈال رہی ہیں۔ انہوں نے کہا کہ بھٹو کو پھانسی دینے والے ججوں نے بعد میں پچھتاوے کا اظہار کیا لیکن ملک کو ہونے والے نقصان کی تلافی نہ ہوسکی،میری سیاست عہدوں کے لئے نہیں عوام کی خدمت کے لئے ہے۔پورے پاکستان نے دیکھا کہ کس طرح غیر آئینی اقدامات کے ذریعے پہلے دن سے ہمیں جائز حق حکمرانی سے محروم رکھنے کی کوشش کی گئی۔تمام مشکلات کے باوجود آٹے پر سبسڈی ، مفت ادویات اور روشن گھرانا مفت بجلی جیسے پروگرامز سے عوام کو ریلیف دینے کے مشن سے پیچھے نہیں ہٹا۔ ان کا مزید کہنا تھاکہ سدا بادشاہی اللہ تعالی کی ہے، نہ کسی کی ہار ہمیشہ کی ہے نہ کسی جیت کو دوام حاصل ہے۔مشن پاکستان کو بچانا ہے اور میں اس سے پیچھے نہیں ہٹوں گا
