اسلام آباد (مانیٹرنگ ڈیسک /این این آئی)سپریم کورٹ مزاری کے فیصلے کے خلاف درخواست کی سماعت کل کرے گی۔تفصیلات کے مطابق سپریم کورٹ پنجاب میں چیف منسٹر کے الیکشن کے دوران ڈپٹی اسپیکر دوست محمد مزاری کی جانب سے دی گئی

رولنگ کیخلاف درخواستوں پرکل بروز (پیر) سماعت کرے گی ۔قبلا زیں چیف جسٹس نے سپیکر پرویز الٰہی کی درخواست پر سماعت کے لیے بینچ تشکیل دے دیا۔ دوسری جانب حکومتی اتحادی اور پی ڈی ایم میں شامل جماعتوں نے فل کورٹ تشکیل دینے کے لئے سپریم کورٹ میں پٹیشن دائر کرنے کا فیصلہ کرلیا،حکومتی اتحادی اور پی ڈی ایم کی جماعتوں کے قائدین (آج)پیر کی صبح ساڑھے 10 بجے مشترکہ پریس کانفرنس میں اہم اعلان کریں گے،حکومتی اتحادی اور پی ڈی ایم کی جماعتوں کے قائدین پریس کانفرنس کے بعد اپنے وکلاء کے ہمراہ مشترکہ طور پر سپریم کورٹ جائیں گے۔ میڈیا رپورٹ کے مطابق وزیر اعلیٰ پنجاب کے انتخاب، سپریم کورٹ بار کی نظر ثانی درخواست اور متعلقہ درخواستوں کی ایک ساتھ سماعت کرنے کی استدعا کی جائے گی،پاکستان مسلم لیگ (ن)، پی پی پی، جے یو آئی (ف) سپریم کورٹ جائیں گے،ایم کیوایم، اے این پی، بی این پی، باپ سمیت دیگر اتحادی جماعتیں بھی درخواست گزاروں میں شامل ہیں،تمام جماعتوں کے وکلاء سپریم کورٹ میں آئین کے آرٹیکل 63 اے پر دلائل دیں گی۔