عوام اور ارکان اسمبلی عمران خان کے ساتھ کھڑے ہیں، ایوان کی اکثریت کا فیصلہ ہمارے حق میں آیا، چودھری پرویزالٰہی
لاہور (آن لائن) پاکستان مسلم لیگ اور پاکستان تحریک انصاف کی پارلیمانی لیڈر شپ کا مشترکہ مشاورتی اجلاس منعقد ہوا۔
اجلاس میں سپیکر پنجاب اسمبلی چودھری پرویزالٰہی، سابق وزیراعلیٰ پنجاب سردار عثمان بزدار، تحریک انصاف کے
سینئر رہنما فواد چودھری، زلفی بخاری، سبطین خان، احسن سلیم بریار، سردار نصر اللہ دریشک، چودھری شہباز حسین،
وسیم بادوزئی، سہیل ظفر چیمہ اور دونوں جماعتوں کے ارکان پنجاب اسمبلی شریک ہوئے۔ اجلاس میں پنجاب پر اقلیت
رکھنے والے کو اکثریت پر مسلط کرنا قابل مذمت قرار دیتے ہوئے کہا گیا کہ پنجاب اسمبلی کے ایوان نے چودھری پرویزالٰہی کے
حق میں اکثریتی فیصلہ سنایا، کیا یہ مذاق نہیں کہ 186 ارکان پر اقلیتی ارکان کو مسلط کر دیا جائے۔
چودھری پرویزالٰہی نے کہا کہ عوام اور ارکان اسمبلی عمران خان کے ساتھ کھڑے ہیں اور ایوان کی اکثریت کا فیصلہ ہمارے حق میں آیا۔
