لاہور(مانیٹرنگ ڈیسک) وزیراعلیٰ پنجاب کے معاملے پر پرویز الٰہی کی درخواست منظور، سپریم کورٹ کا بینچ تشکیل دے دیا گیا۔میڈیا رپورٹس کے مطابق چیف جسٹس پاکستان جسٹس عمر عطا بندیال کی سربراہی میں تین رکنی بینچ چوہدری پرویز الٰہی کی درخواست پر سماعت کرے گا۔
سپریم کورٹ کے تین رکنی بینچ میں جسٹس اعجازالاحسن اور جسٹس منیب بھی شامل ہیں۔اس حوالے سے گفتگو کرتے ہوئے بیرسٹر علی ظفر نے کہا کہ چیف جسٹس عمرعطابندیال اور جسٹس اعجاز الاحسن لاہور ہی میں ہیں جو جلد درخواست پر سماعت کریں گے۔اس سے قبل نو منتخب وزیر اعلیٰ پنجاب حمزہ شہباز نے اپنے عہدے کا حلف اٹھالیا۔گورنر ہاؤس لاہور میں ہونے والی تقریب میں گورنر پنجاب بلیغ الرحمان نے حمزہ شہباز سے ان کے عہدے کا حلف لیا اس موقع پر ن لیگ اور پیپلز پارٹی کے رہنماؤں نے تقریب میں شرکت کی۔نومنتخب وزیر اعلیٰ پنجاب کی حلف برداری کے بعد ن لیگ اور پی پی کے کارکنان نے اپنی اپنی جماعتوں کے حق میں نعرے لگائے۔یاد رہے کہ گزشتہ روز ن لیگ کے امیدوار حمزہ شہباز دوبارہ وزیراعلیٰ پنجاب منتخب ہوگئے جبکہ پرویز الہیٰ کو پھر شکست کا سامنا کرنا پڑا۔علاوہ ازیں سپریم کورٹ بار ایسوسی ایشن کے صدر احسن بھون نے کہا ہے کہ سپریم کورٹ کے فیصلے کی روشنی میں ڈپٹی اسپیکر نے رولنگ دی، ہم نے پہلے بھی کہا تھا کہ اس وقت کا فیصلہ درست نہیں تھا۔انہوں نے کہا کہ سپریم کورٹ کو کسی ایک شخص کے فائدے کے بجائے آئین کے تحت فیصلہ کرنا چاہیے تھا۔
