واشنگٹن(این این آئی)امریکا کے صدر جوبائیڈن نے پاک امریکا تعلقات آگے بڑھانے کے لیے ٹھوس بنیادیں قائم کرنے کی خواہش کا اظہارکرتے ہوئے کہاہے کہ پاکستان سیکیورٹی، تجارت، سرمایہ کاری اور ثقافت سمیت تمام میدانوں میں امریکا کے ساتھ مل کر کام کرنے کا خواہاں ہے،

میڈیارپورٹس کے مطابق امریکا میں پاکستانی سفارت خانے کی طرف سے جاری کردہ ایک پریس ریلیزمیں کہاگیاکہ مسعود خان نے امریکی صدر کے ساتھ ملاقات اور مبارکباد اور ایک سرکاری تصویر کے لیے وائٹ ہائوس کا دورہ کیا جو نئے تعینات ہونے والے سفیروں کے لیے ایک پہلے سے قائم روایت ہے۔بیان میں کہا گیا کہ تقریب کے دوران امریکی صدر اور سفیر نے امریکا اور پاکستان کے نمابین تعلقات میں کو آگے بڑھانے کے لیے ایک مضبوط بنیاد بنانے پر مختصر بات چیت کی۔اس موقع پر سردار مسعود خان نے جوبائیڈن سے بات چیت کرتے ہوئے کہا کہ پاکستان سیکیورٹی، تجارت، سرمایہ کاری اور ثقافت سمیت تمام میدانوں میں امریکا کے ساتھ مل کر کام کرنے کا خواہاں ہے۔امریکی حکومت ایک روایت کی پیروی کرتی ہے جس کے تحت واشنگٹن میں نئے سفیروں کے تقرر کے بعد وائٹ ہاس میں ایک تقریب منعقد کی جاتی ہے جہاں نئے سفیر اپنے تقرر کے مطابق سربراہ مملکت کو اپنی اسناد پیش کرتے ہیں۔واضح رہے کہ سردار مسعود خان نے واشنگٹن پہنچنے کے بعد اپنی اسناد سفارتی چیف آف پروٹوکول کو دی تھیں جنہیں 19 اپریل 2022 کو باضابطہ طور پر قبول کرلیا گیا تھا۔تاہم صدر جوبائیڈن سے ملاقات کے موقع پر لی گئی رسمی تصویر ہی اس پورے عمل کو مکمل کرتی ہے۔ بیان میں کہا گیا کہ صدر کے ساتھ سرکاری تصویر کے لیے 46 دیگر سفیر بھی وہاں موجود تھے جن کو ایک ایک کر کے بلایا گیا، یہ تمام سفرا بھی کووڈ۔19 کی پابندیوں کی وجہ سے ایک سال سے زیادہ عرصے سے صدر سے ملاقات نہیں کر سکے تھے۔