اسلام آباد(این ای آئی) اینٹی نارکوٹکس فورس نے منشیات سمگلنگ میں ملوث گروہ کو بے نقاب کردیا۔ترجمان اے این ایف کے مطابق موٹروے ٹول پلازہ اسلام آباد کے قریب خفیہ اطلاعات پر کارروائی عمل میں لائی گئی اور ایک کار سے مجموعی طور پر 104کلو 400گرام منشیات برآمد کرلی گئی، منشیات میں 87کلو 600 گرام چرس ،16کلو 800گرام افیون شامل تھی۔ترجمان کے مطابق واقعے کا افسوسناک پہلو یہ ہے کہ گھنانے دھندے میں ملوث تین خواتین سمیت چار ملزمان کو گرفتار کیا گیا۔اے این ایف کے مطابق منشیات گاڑی کے فرش میں بنائے گئے خفیہ خانوں میں چھپائی گئی تھی۔یہ پہلا موقع نہیں ہے جب خواتین کے ذریعے منشیات سمگلنگ کرنے کی کوششوں کو ناکام بنایا گیا ہے۔اس سے قبل کراچی پولیس نے بھی بلوچستان سے منشیات لاکر فروخت کرنیوالے گروہ کے 14کارندے گرفتار کئے تھے، جن میں پانچ خواتین بھی شامل تھیں۔