اسلام آباد (این این آئی)پاکستان مسلم لیگ (ن) کے سنیئر نائب صدر اور سابق وزیراعظم شاہد خاقان عباسی نے ملک میں لوڈ شیڈنگ بڑھنے پر عوام سے معذرت کرلی۔میڈیا سے گفتگو کرتے ہوئے شاہد خاقان عباسی نے کہا کہ لوڈ شیڈنگ پر عوام سے معذرت چاہتے ہیں،

اس وقت 4 ہزار میگاواٹ کی کمی ہے۔شاہد خاقان عباسی نے کہا کہ منگل سے لوڈشیڈنگ میں کمی آئے گی، دورانیہ کم ہو کر ساڑھے تین گھنٹے رہ جائے گا جبکہ 16 جون سے لوڈشیڈنگ کا دورانیہ 3 گھنٹے سے بھی کم رہ جائے گا۔رہنما مسلم لیگ (ن) نے کہا کہ بجلی کی طلب 25 ہزار میگاواٹ سے بڑھ چکی ہے، جون کے آخر تک لوڈشیڈنگ دو گھنٹے پر آجائے گی۔انہوں نے کہا کہ اقتدار میں آئے تو جو ایندھن موجود تھا اس سے 18 ہزار میگاواٹ بجلی پیدا ہوسکتی تھی۔شاہد خاقان عباسی نے کہا کہ پیٹرولیم مصنوعات کی قیمتِ خرید سے کم پر عوام کو دینا ہمارے لیے ممکن نہیں۔انہوںنے کہاکہ بجلی کی پیداوار کو 21 ہزار میگا واٹ تک لے گئے ہیں ،تقریباً 4 ہزار میگا واٹ کی کمی کا سامنا ہے جس کی وجہ سے لوڈ شیڈنگ ہو رہی ہے ۔انہوںنے کہاکہ گزشتہ حکومت کی کوتاہیوں اور کرپشن کی ایک لمبی داستان ہے،پٹرولیم مصنوعات پر ایک فیصد بھی ٹیکس لاگو نہیں ہے،پٹرولیم مصنوعات قیمت خریدپر فروخت کی جائیں گی۔ انہوںنے کہاکہ قیمت خرید سے کم پرپٹرولیم مصنوعات فروخت نہیں کر سکتے،ماضی کی حکومت خود کش حملہ کر کے گھر جا چکی ہے۔ انہوںنے کہاکہ بغیر کسی خوف کے عوام کے مسائل جلد حل کرنے کیلئے کوشاں ہیں،ماضی کی حکومت نے بروقت اقدامات کیے ہوتے تو آج یہ حالات نہ ہوتے،ملک میں سارے یونٹس پیداوار دیں تو 27ہزار میگاواٹ بجلی پیدا ہو گی۔