اسلام آ باد ٗ لاہور (آئی این پی ) وفاقی وزیر اور مسلم لیگ ن کے رہنما میاں جاوید لطیف نے کہا ہے کہ عمران خان کے بارے میں حکیم سعید کی کئی سال پہلے کہی ہوئی باتیں آج سچ ثابت ہو رہی ہیں،اب بلی مکمل طور پر تھیلے سے باہر آ چکی ہے،پہلے عمران خان نے ملک کی معیشت کمزور کی۔
اب منصوبہ بندی کے تحت پاکستان کے دفاع کو نقصان پہنچانا چاہتا ہے۔ اپنے بیان جاوید لطیف نے کہاعمران خان کے بیانات بغاوت کے زمرے میں آتے ہیں،دھرنے کے نام پر ایک اکائی کے مرکز پر حملے اور کارکنوں کو اسلحہ لانے کی ترغیب مسلح جدوجہد کے مترادف ہے،یہی خواہش سب پاکستان دشمن قوتیں بھی رکھتی ہیں جو عمران خان دہرا رہا ہے،قوم میں اضطراب بڑھ رہا ہے ریاستی اداروں کو اس باغی کو فورا کچلنا چاہیے،اسی سازش کو بھانپتے ہوئے غیر مقبول فیصلہ کیا،ایٹمی پروگرام کی ہر طرح کی قیمت پہلے بھی چکائی آئندہ بھی ہر قربانی کے لیے تیار ہیں۔دوسری جانب عمران خان کے متنازع بیان کے خلاف پنجاب اسمبلی میں ن لیگ کی جانب سے مذمتی قرارداد جمع کرا دی گئی، قرارداد میں بیان کی مذمت کرتے ہوئے سپریم کور ٹ سے بیان کا نوٹس لینے کامطالبہ کیا گیا ہے۔ پنجاب اسمبلی میں قرارداد مسلم لیگ(ن)کی رکن سعدیہ تیمور اور سمیرا کومل کی جانب سے جمع کرائی گئی، قرارداد میں کہا گیاہیکہ عمران خان سوچی سمجھی سازش کے تحت ملک میں انارکی پھیلانا چاہتے ہیں۔ قرار داد میں مزید کہا گیا کہ قوم افواج پاکستان کے ساتھ ہے، بائیس کروڑ عوام عمران خان کے ناپاک عزائم کبھی کامیاب نہیں ہونے دینگے۔
