لاہور (این این آئی) پنجاب حکومت نے سابق وزیراعلی پنجاب سردار عثمان بزدار کی حکومت میں ہونے والی کرپشن کی تحقیقات کا فیصلہ کرلیا ۔ نجی ٹی وی کے مطابق صوبائی حکومت نے جنوبی پنجاب کے منصوبوں میں ہونے والی مبینہ کرپشن پر کارروائی کا فیصلہ کیا ہے۔
اینٹی کرپشن نے، ملتان، ڈیرہ غازی خان اور بہاولپور کے منصوبوں کا ریکارڈ بھی قبضے میں لے لیا ہے۔سابق وزیراعلی پنجاب عثمان بزدار اور متعلقہ حکام کیخلاف گھیرا سخت کرنے کیلئے آئندہ چند روز میں سمن جاری کرنے کا بھی امکان ظاہر کیا گیا ہے۔موجودہ حکومت کی جانب سے سابق حکومت کی مبینہ کرپشن کے منصوبوں پر کارروائیاں تیز کرنے کی ہدایت بھی دی گئی ہیں۔دوسری جانب لاہور ہائیکورٹ نے وزیراعلی پنجاب حمزہ شہباز کی حلف برداری کیخلاف کیس میں صدر مملکت اور گورنر پنجاب کو فریق بنانے کا حکم دے دیا۔حمزہ شہباز کے حلف کے خلاف تحریک انصاف اور ق لیگ سمیت دیگر کی اپیلوں پر سماعت ہوئی۔ تحریک انصاف کے وکیل نے کہا کہ آئین میں گنجائش نہیں ہے کہ اسپیکر قومی اسمبلی وزیراعلی سے حلف لے۔ وفاقی حکومت کے وکیل نے موقف اختیار کیا کہ کیس میں گورنر کی بجائے وفاقی حکومت کو فریق بنانا زیادہ ضروری ہے۔لارجر بینچ نے پی ٹی آئی کے وکیل کو صدر مملکت اور گورنر پنجاب کو فریق بنانے کی ہدایت کرتے ہوئے کہا کہ اپیل میں ترمیم کرکے صدر اور گورنر کو فریق بنائیں، ہم صدر اور گورنر کو بھی سننا چاہتے ہیں۔ بینچ نے اپیلوں پر کارروائی کل تک کے لئے ملتوی کر دی۔
