لاہور( این این آئی)بجلی کی طلب اور رسد میں شارٹ فال کے باعث تعطیل کے روز بھی بجلی کی بد ترین لوڈ شیڈنگ جاری رہی جس سے عوام کو شدید مشکلات کا سامنا رہا ، مختلف شہری علاقوںمیں8سے10جبکہ دیہی علاقوںمیں12سے14گھنٹے لوڈ شیڈنگ جاری رہی

،کئی علاقوںمیں پانی کا بھی شدید بحران رہا ۔ ذرائع کے مطابق بجلی کی طلب 25 ہزار 997 میگاواٹ جبکہ مجموعی پیداوار 19 ہزار465 میگاواٹ رہی ، پن بجلی سے 4 ہزار 662 میگاواٹ بجلی پیدا ہو رہی ہے ،سرکاری تھرمل پاور پلانٹس 1 ہزار 60 میگاواٹ بجلی بنا رہے ہیں، آئی پی پیز سے 9 ہزار 677 میگاواٹ بجلی حاصل کی جا رہی ہے۔طلب کے مقابلے میںبجلی کا شارٹ فال 5 ہزار 538 میگاواٹ ریکارڈ کیا گیا جس سے مختلف شہری علاقوںمیں8سے10جبکہ دیہی علاقوںمیں 12سے14گھنٹے لوڈ شیڈنگ کی گئی ۔ ذرائع کے مطابق ان علاقوںمیں زیادہ لائن لاسز والے علاقے بھی شامل ہیں۔دوسری جانب بجلی کی غیر اعلانیہ لو ڈشیڈنگ کی وجہ سے ٹیوب ویل نہ چلنے کی وجہ سے پانی کا بحران بھی شدید ہو گیا ہے اور لوگ پانی کی بوند بوند کو ترس گئے ۔خواتین کا کہنا ہے کہ غیر اعلانیہ لوڈ شیڈنگ کی وجہ سے معمولات زندگی بری طرح متاثر ہو رہے ہیں۔ دوسری جانب لاہوریوںنے گرمی کی شدت سے بچنے کے لئے نہر کا رخ کیا جس کی وجہ سے کئی مقامات پر نہر کناروں پر انتہائی رش دیکھنے میں آیا ۔ نوجوانوں کے علاوہ فیملیاں بھی سارا دن نہر کنارے موجود رہیں اور اس دوران کھانے پینے کا بھی اہتمام کیا گیا۔