اسلام آباد (این این آئی)وزیراعظم شہباز شریف نے اپنی سربراہی میں وفاقی وزرا، کاروباری شخصیات اور ماہرین پر مشتمل 21 رکنی اقتصادی مشاورتی کونسل تشکیل دے دی۔وزارت خزانہ کی جانب سے جاری نوٹیفکیشن کے مطابق وزیراعظم اقتصادی مشاورتی کونسل کے چیئرمین ہوں گے
اور اس میں نجی شعبے سے بھی ارکان کو شامل کیا گیا ہے۔نوٹیفکیشن کے مطابق کونسل میں شامل حکومتی ارکان میں سابق وزیراعظم شاہد خاقان عباسی، وفاقی وزیر منصوبہ بندی احسن اقبال، وزیر خزانہ مفتاح اسمعیل، وزیراطلاعات مریم اورنگ زیب، سلیم مانڈوی والا، عائشہ غوث پاشا، مصدق ملک شامل ہیں۔وزیراعظم کی تشکیل کردہ اقتصادی مشاورتی کونسل کے دیگر اراکین میں طارق پاشا، میاں منشا، محمد علی طبہ، عارف حبیب، ڈاکٹر عاصم حسین، عاطف باجوہ، احسن فرید، اورنگ زیب، وقار احمد، سلمان احمد، شہزاد سلیم، رحمن نسیم، مصدق ذوالقرنین، ڈاکٹر اعجاز نبی شامل ہیں۔نوٹیفکیشن کے مطابق اقتصادی مشاورتی کونسل کے ٹی او آرز اور دائرہ کار بھی جاری کردیا گیاہے، جس کے تحت اقتصادی مشاورتی کونسل اقتصادی پالیسیوں کا جائزہ لے گی۔اقتصادی مشاوتی کونسل قلیل مدتی میکرو اکنامک استحکام کے لیے تجاویز دے گی اور اس کے علاوہ اسٹرکچرل اصلاحات کے لیے بھی تجاویز دے گی۔وزارت خزانہ نے بتایا کہ اقتصادی مشاورتی کونسل کا اجلاس ہفتہ وار بنیادوں پر ہوگا، کونسل ملک کی مجموعی معاشی صورت حال کا جائزہ لے گی اور معیشت کی بہتری کے لیے اقدامات تجویز کرے گی۔نوٹیفکیشن کے مطابق اقتصادی مشاورتی کونسل کے تحت ذیلی کمیٹیاں تشکیل دی جائیں گی۔
