اسلام آباد (این این آئی) قومی کرکٹ ٹیم کے کپتان بابر اعظم کی بچن کی تصویر وائرل ہوگئی ۔تصویر بابر اعظم کے والد نے شیئر کی ہے جس میں نمبر ون کرکٹر کو معصومیت بھرے انداز میں کرکٹ کِٹ زیب تن کیے بیٹھے دیکھا جا سکتا ہے۔بابر اعظم کے والد نے یہ تصویر شیئر کرتے ہوئے لکھا کہ ہر ماں باپ کا بچہ اْن کی نظر میں بس اتنا ہی بڑا ہوتا ہے، بے شک وہ 50 سال کا ہی کیوں نہ ہو۔

دوسری جانب قومی ٹیم کے کپتان بابر اعظم نے انسٹاگرام پر گنبد خضراء کے روح پرور منظر کے ساتھ اپنی تصویر شیئر کی ہے۔تصویر میں بابر اعظم کو کسی اونچی جگہ کھڑا دیکھا جاسکتا ہے جبکہ تصویر کے بیک گراؤنڈ میں مسجد نبویؐکا دل موہ لینے والا منظر سوشل میڈیا صارفین کی توجہ اپنی جانب کھینچ رہا ہے۔ بابراعظم کے والد اعظم صدیقی کی جانب سے بھی بابر کے ہمراہ تصویر شیئرکرتے ہوئے مداحوں کو قومی ٹیم کے کپتان کی عمرہ روانگی سے قبل مصروفیات سے آگاہ کیاگیا۔اعظم صدیقی نے کہا کہ عمرہ روانگی سے پہلے بابر کافی دیر میرے پاس رہا ، اللہ پاک نے توفیق دی اپنے گھر بلا لیا، اللہ اپنے گھر کی حاضری قبول فرمائے اور نبیؐکے روضے کی زیارت بھی قبول و مقبول کرے۔انہوں نے لکھا کہ دعا ہے رحمتوں کا یہ سفر ہمارے گھر اورسب گھر والوں اور بابر کے لیے ہر زحمت کو رحمت میں بدل دے اور صرف خیر ہی خیر ہو، جو خطائیں ہیں انعام میں بدل جائیں اور ہم سب ہر سال مکہ و مدینہ جائیں۔ آمین۔ قبل ازیں سابق بھارتی اسپینر ہر بھجن سنگھ بھی پاکستانی کپتان بابر اعظم کی بیٹنگ کے دیوانے ہو گئے ،انہوں نے بابرکو مستقبل کا لیجنڈقراردیدیا۔ہربھجن سنگھ نے حال ہی میں ایک انٹرویو میں کہا کہ بابراعظم کی بیٹنگ ٹیکنیک بہترین ہے وہ ہمیشہ اعتماد کے ساتھ کھیلتے ہیں۔انہوںنے کہاکہ میرے خیال میں بابراعظم کو فیب 4 میں شامل کرنا قبل ازوقت ہے تاہم مستقبل میں وہ کرکٹ کے لیجنڈز میں سے ایک ہوں گیکیوں کہ وہ صلاحیتوں میں کسی سے کم نہیں ہیں۔