اسلام آباد (این این آئی) پاکستانیوں کی زیادہ تر تعداد نے عمران خان کو وزرات عظمیٰ کے منصب سے ہٹانے کے پیچھے امریکی سازش کے نظریے کو ایک بار پھر مسترد کردیا۔عوامی آرا جاننے کے حوالے سے معروف ادارے گیلپ پاکستان نے نیا سروے جاری کردیا جس میں عوام

کی زیادہ تر تعداد نے عمران خان کو وزرات عظمیٰ کے منصب سے ہٹانے کے پیچھے امریکی سازش کے نظریے کو ایک بار پھر مسترد کیا۔سروے میں عوام نے مہنگائی کو وجہ بتادیا۔گزشتہ سروے میں 64 فیصد افراد نے مہنگائی کو حکومت کے خاتمے کی وجہ بتایا تھا جبکہ موجودہ سروے میں یہ تعداد 66 فیصد پر آگئی ہے۔سروے میں 60 فیصد شہریوں نے سابق اپوزیشن رہنماؤں پر عمران خان کے غداری کے الزامات بھی بے بنیاد قرار دیے۔سروے رپورٹ میں خیبر پختونخوا اورسندھ میں 65 فیصد اور پنجاب میں 58 فیصد شہریوں نے الزامات ماننے سے انکار کردیا۔دوسری جانب مسلم لیگ(ن) کے رہنما احسن اقبال نے عمران خان کی تقریر پر ردعمل دیتے ہوئے کہاہے کہ عمران خان کو آئین شکنی کی سزا ضرور ملے گی۔اپنے بیان میں احسن اقبال نے کہا کہ عمران خان نے آئین توڑا، سویلین مارشل لاء لگایا، آئین توڑنے اور سویلین مارشل لاء لگانے پر رات کو عدالت لگی، انہیں آئین شکنی کی سزا ضرور ملے گی۔ اس کے علاوہ ن لیگ خیبرپختونخوا کے ترجمان اختیارولی نے کہا کہ عمران کی تقریرکا خلاصہ تھا مجھے کیوں نکالا؟ عمران کی آہ وبکا بتا رہی ہے کہ وہ این آراومانگ رہے ہیں لیکن انہیں این آر او نہیں ملے گا۔