اسلام آباد (این این آئی، آن لائن)سابق صدر آصف زرداری نے کہاہے کہ کوئی ہماری مانے یا نہ مانے آئین تو ہماری مانتا ہے۔قومی اسمبلی کے اجلاس میں شرکت کیلئے سابق صدر آصف زرداری پارلیمنٹ ہاؤس پہنچے جہاں انہوں نے صحافیوں سے غیر رسمی گفتگو کی۔

ایک سوال کے جواب میں آصف زرداری نے کہا کہ آج جس کام کیلئے آئے ہیں وہ کرکے جائیں گے۔سابق صدر نے صحافی کے سوال پر کہا کہ جو کچھ ہورہا ہے وہ پہلے سے تو بہتر ہے۔انہوں نے کہاکہ کوئی ہماری مانے یا نہ مانے آئین تو ہماری مانتا ہے۔دوسری جانب ترجمان پی ڈی ایم حافظ حمداللہ نے پارلیمنٹ کی موجودہ صورتحال اور اسپیکر کے کردار پر ردعمل دیتے ہوے کہا ہے کہ عدالت کے فیصلے کے مطابق پارلیمان 3اپریل کی پوزیشن پر واپس آئی ہے ۔ اپنے بیان میں انہوں نے کہا اسپیکر عدالتی فیصلے پر عمل کرنے کا پابند ہے۔ عدالتی فیصلے کاتقاضاہے کہ آئین اور قانون کے مطابق ایوان چلایا جائے۔ معلوم ہوتا ہے کہ اسپیکر نے ڈپٹی اسپیکر کی روش پر عمل پیرا ہیں انہوں نے کہا اسد قیصر اسپیکر بننے کا مظاہرہ کریں بنی گالہ کا ٹائیگر نہ بنیں،۔ انہوں نے کہا عجیب کھیل ہے کھلاڑی گراؤنڈ میں ہیں اور کپتان غائب ہے۔ انہو ں نے کہا کپتان جس کپتان نے آخری گیند تک لڑنا تھا وہ گراونڈ کے بجائے تماشائیوں میں بیٹھ کرمیچ دیکھ رہا ہے۔ انہوں نے کہا عمران نیازی ہمت اورغیرت دکھاؤ رولزکے مطابق میچ کھیلو۔ تم ٹائیگر فورس کو غیرت کا سبق دے رہے ہوخودبھاگے ہوئے ہو۔ انہوں نے کہا انشائ اللہ عمران کا سیاسی جنازہ اپوزیشن کے ہاتھوں دھوم دھام سے نکلے گا۔