پشاور(این این آئی)خیبر پختونخوا کے بالائی علاقوں میں مغربی ہواؤں کا نیا سلسلہ داخل ہونے پر
پی ڈی ایم اے نے تیز بارشوں اور گلیشیائی جھیلوں کے پھٹنے کا خدشہ ظاہر کرتے ہوئے الرٹ جاری کر دیا۔ صوبائی ڈیزاسٹر مینجمنٹ اتھارٹی کے مطابق مغربی ہواؤں کے باعث بالائی اضلاع میں شدید بارشوں، لینڈ سلائیڈنگ اور گلیشیائی جھیلوں کے پھٹنے سے فلیش فلڈنگ کا سنگین خطرہ موجود ہے۔ صورتحال کے پیش نظر ضلعی انتظامیہ کو حساس گلیشیائی مقامات کی کڑی نگرانی اور قبل از وقت انتباہی نظام (وارننگ سسٹم) کو مکمل فعال رکھنے کی ہدایت کی گئی ہے۔ پی ڈی ایم اے نے مقامی آبادی اور سیاحوں کو ندی نالوں اور دریاؤں کے قریب جانے سے گریز کرنے کی تاکید کی ہے۔ اس کے علاوہ نشیبی علاقوں کے رہائشیوں کو الرٹ رہنے، ہنگامی صورتحال میں محفوظ مقامات پر منتقل ہونے اور حساس علاقوں میں مویشیوں سمیت ضروری سامان کو پہلے سے بلند مقامات پر منتقل کرنے کی ہدایت کی گئی ہے۔
