اسلام آباد (این این آئی)اسلام آباد انتظامیہ نے پاکستان تحریک انصاف اور جمعیت علمائے اسلام ف کو جلسے کی اجازت دے دی۔ ذرائع کے مطابق اسلام آباد انتظامیہ نے دونوں پارٹیوں کو جلسے کے لیے این او سی جاری کر دیا۔ ڈپٹی کمشنر اسلام آباد کے مطابق جے یو آئی ف کو

25 مارچ کو ایچ نائن اتوار بازار کے علاقے میں جلسے کی اجازت دے دی گئی،پاکستان تحریک انصاف کو 27 مارچ کو پریڈ گراؤنڈ میں جلسے کی اجازت دے دی گئی۔ حمزہ شفقات کے مطابق دونوں سیاسی جماعتوں کو جلسے کی اجازت صرف ایک دن کے لیے دی گئی ہے،دونوں سیاسی جماعتیں رات تک جلسہ گاہ کو خالی کرنے کی پابند ہو نگی۔دوسری جانب جانب جمعیت علماء اسلام (ف) کا قافلہ ہفتہ کو مولافضل الرحمن کی سربراہی میں ڈیرہ اسماعیل خان سے روانہ ہوگا ۔ترجمان جے یو آئی ف اسلم غوری کے مطابق مولانا فضل الرحمان کی قیادت میں مہنگائی مارچ کا قافلہ ڈی آئی خان سے 26 مارچ کو روانہ ہو گا۔اسلم غوری کے مطابق قافلہ شام 5 بجے ہکلہ انٹرچینج پہنچے گا، صوبائی قافلے صوبائی قیادت کی ہدایات کے مطابق روانہ ہوں گے۔جے یو آئی ف کے ترجمان کے مطابق تمام قافلے 26 مارچ کی شام اسلام آباد میں داخل ہوں گے، قافلے سری نگر ہائی وے جی نائن پر جمع ہوں گے۔دوسری جانب پاکستان مسلم لیگ ن بھی مہنگائی مارچ کے شیڈول کا اعلان کر چکی ہے جو لاہور سے 24 مارچ کو مریم نواز اور حمزہ شہباز کی قیادت میں اسلام آباد سے روانہ ہو گا۔