اسلام آباد (این این آئی ، آن لائن)سابق گورنر سندھ اور مسلم لیگ (ن )کے رہنما محمد زبیر نے دعویٰ کیا ہے کہ وزیراعظم عمران خان قومی اسمبلی میں اکثریت کھو چکے ہیں اور انہیں 179 ممبران کی حمایت حاصل نہیں ہے۔رہنما ن لیگ کی جانب سے سوشل میڈیا پر ٹوئٹ کے ذریعے وزیراعظم عمران خان کو قومی اسمبلی میں حاصل اراکین کی تعداد ظاہر کر دی۔
سابق گورنر سندھ نے اپنی ٹوئٹ میں بتایا کہ عمران خان کو اب 179 ارکان کی حمایت حاصل نہیں ہے، عمران خان کے اتحادی جن کے پاس 17 نشستیں ہیں یعنی پاکستان مسلم لیگ ق، بلوچستان عوامی پارٹی اور ایم کیو ایم پاکستان نے اب تک فیصلہ نہیں کیا، مطلب یہ تینوں جماعتیں عمران خان کے ساتھ نہیں ہیں۔پاکستان تحریک انصاف کے تقریباً 20 ممبران واضح طور پر کہہ رہے ہیں کہ وہ عمران خان کے خلاف ہیں یعنی 179 میں سے 37 ارکان کو نکال دیں تو عمران خان کو 142 ممبران کی حمایت حاصل ہے جس کا مطلب ہے کہ اب عمران خان کو اکثریت میں سے 30 ممبران کی کمی کا سامنا ہے۔دوسری جانب وزیر اعظم عمران خان کے خلاف تحریک عدم اعتماد کے معاملہ پر اراکین میں عدم اعتماد کی قرارداد کا نوٹس تقسیم کرنے کے بعد اسمبلی سیکرٹریٹ کو الرٹ کردیا گیا ہے ۔ ذرائع کا کہنا ہے کہ سیکرٹری قومی اسمبلی نے حکم دیا ہے کہ کسی بھی وقت اب سپیکر اجلاس طلب کرسکتے ہیںسب سٹاف تیار رہے۔سپیکرکل یا پیر کو اجلا س بلانے کا نوٹیفیکیشن جاری کرسکتے ہیں۔اپوزیشن قیادت نے بھی اپنے اراکین کو ہفتہ وار چھٹی کے باوجود حلقوں میں جانے سے روک دیا۔تمام اراکین کو اپنی رہائشگاہوں پر رہنے اور چیف وہپ کو حاضری کی ہدایت کی گئی ہے ۔حکومتی اراکین کو بھی اطلاع دے دی گئی۔ قومی اسمبلی اجلاس میں پہلے خیال زمان اورکزئی کیلئے فاتحہ خوانی ہوگی۔
