ماسکو (آئی این پی) ایک جانب روسی فوج یوکرین میں برسرپیکار ہے تو وہیں اس کی خواتین فوجیوں میں مقابلہ حسن کا بھی انعقاد کیا جارہا ہے۔یوکرین اور روس کے درمیان تنازع کے اثرات ناصرف خطے بلکہ دنیا بھر پر پڑ رہے ہیں، عالمی منڈی میں خام تیل اور اشیائے خورونوش کی

قیمتیں آسمان کو چھو رہی ہیں۔دوسری جانب روس کی فوج میں خدمات سرانجام دینے والی خواتین کے درمیان مقابلہ حسن کا بھی انعقاد کیا گیا جس کا عنوان ’فوجی کیموفلاج کے پیچھے خوبصورتی‘ رکھا گیا تھا۔روسی میگزین کے مطابق مقابلہ حسن میں 40 خاتون فوجیوں نے شرکت کی جن میں کچھ کا کا تعلق روسی اسٹریٹجک میزائل فورسز سے بھی تھا۔مقابلہ حسن کے پہلے مرحلے میں خاتون فوجیوں کو میدان جنگ میں لڑائی کے دوران اختیار کئے گئے بھیس میں نظر آنا تھا۔اس مرحلے میں خاتون فوجی خاص قسم کے گیس ماسک پہنے بھی جلوے بکھیرتی نظر آئیں جیسے وہ قاتل حسینائیں کیمیائی اور حیاتیاتی جنگ میں حصہ لے رہی ہوں۔مقابلہ حسن میں ایسے مراحل بھی شامل تھے جن میں خواتین کی جنگی قابلیت کا اندازہ لگایا جاسکے۔ایک مرحلے میں خاتون فوجیوں کو میدان جنگ میں اپنے ساتھیوں کی جان بچانے کا چیلنج بھی دیا گیا تھا۔مقابلہ حسن کے دوران زخمی سپاہیوں کو جوان مردی سے محاذ سے نکال کر محفوظ جگہ پہنچانے کی بھی مشق کی گئی۔