اسلام آباد (این این آئی) پاکستان مسلم لیگ (ن) کے رہنما میاں جاوید لطیف نے کہا ہے کہ تحریک عدم اعتماد کے دن ورکرز کو اکھٹا کرنے کی بات خون ریزی سے عدم اعتماد روکنے کی سازش ہے۔ ایک انٹرویومیں انہوں نے کہاکہ تحریک عدم اعتماد کے دن ورکرز کو اکھٹا کرنے کی بات خون ریزی سے
عدم اعتماد روکنے کی سازش ہے۔انہوں نے کہاکہ اپوزیشن نے اس حوالے سے تمام تر انتظامات کر لیے ہیں،ہم اپنے اور حکومتی ممبران کو بحفاظت ایوان تک پہنچانے کے انتظامات کر چکے ہیں۔ انہوں نے کہاکہ اگر طاقت سے اکثریت کو اقلیت میں بدلنے کی کوشش کی گئی تو گلی کوچوں سے ردعمل آئے گا،عمران خان کی طرح آئینی اداروں کونہ ماننے کی ماضی میں کسی وزیر اعظم کی ایک نظیر نہیں ملتی۔ انہوں نے کہاکہ اگر آرمی چیف نے مولانا کو نام بگاڑ کر نہ لینے کا کہا تو آج جلسے میں بار بار ذکر کر کے کسے میسج دیا؟،گزشتہ روز ڈی جی آئی ایس پی آر نے وضاحت کی فوج نیوٹرل ہے آج وزیر اعظم کا نیوٹرل کا لفظ جانور کیلئے استعمال کرنا ریاستی اداروں کیلئے الارمنگ ہے۔ انہوں نے کہاکہ ڈی چوک میں تحریک عدم اعتماد سے پہلے لوگوں کو اکھٹا کرنے کی دھمکی کس کے لیے ہے؟۔انہوں نے کہاکہ یہ دھمکی ہارے ہوئے شخص کی باتیں ہیں جو بتانا چاہتا ہے میں کسی بھی حد تک جاؤں گا۔
