اسلام آباد (آن لائن) وفاقی دارالحکومت میں پاکستان تحریک انصاف کی طرف سے اعلان کیے گئے جلسے کے بعد ملک کی تین بڑی سیاسی جماعتوں نے بھی بڑا پاورشو کرنے کا فیصلہ کیا ہے۔ذرائع کیمطابق پاکستان پیپلز پارٹی، مسلم لیگ ن اور جمعیت علمائے اسلام (ف) کی قیادت
کی اسلام آباد میں اہم بیٹھک ہوئی، اس اجلاس میں چیرمین پیپلزپارٹی بلاول بھٹو اور آصف زرداری بھی شریک ہوئے۔ اجلاس کے دوران اپوزیشن جماعتوں کی طرف سے اسلام آباد میں پاور شاو کرنے کا فیصلہ کیا گیا۔ تینوں بڑی جماعتوں نے تجویز دیتے ہوئے کہا کہ پاکستان تحریک انصاف (پی ٹی آئی) کے جواب میں تمام اپوزیشن جماعتیں اسلام آباد میں بڑا جلسہ کریں۔تینوں جماعتوں نے تحریک عدم اعتماد کے دوران سپیکر کے کسی بھی اقدام کے خلاف تمام آئینی آپشنز استعمال کرنے کا فیصلہ کیا ہے۔ دریں اثناء سابق وزیراعظم راجہ پرویز اشرف نے کہا ہے کہ وزیر اعظم عمران خان کا چیلنج قبول ہے، اپوزیشن اسلام آباد میں دس گنا بڑا جلسہ کریگی۔اپنے بیان میں انہوں نے کہا کہ خان صاحب کسی بھول میں نہ رہیں،اپوزیشن کا اکٹھ تاریخی ہو گا، ہم اپنے ممبران کا دفاع کرنا جانتے ہیں، سیاسی مخالفین کیخلاف جہاد کا دعویٰ کرنیوالے پر اسکے اتحادی اتحاد نہیں کر رہے۔راجہ پرویز اشرف نے کہا کہ اپوزیشن پر الزام تراشی سے آپ کا جانا نہیں رکے گا، اگر اپوزیشن کے پاس نمبر نہیں تو آپ اتنے“حواس باختہ“کیوں ہو رہے ہیں؟
