نئی دہلی(این این آئی)متوسط طبقے سے تعلق رکھنے والے بھارتی شہری سشیل شکلا کو دو دہائیوں کی محنت کا صلہ مل گیا۔ انہیں مدھیہ پردیش کی کان سے ایک بڑا ہیرا ملا ہے جس کی مالیت ایک کروڑ بھارتی روپے سے بھی زیادہ ہے۔

غیر ملکی خبر رساں ادارئے کے مطابق چھوٹے پیمانے پر اینٹوں کے بھٹے کا کاروبار کرنے والے سشیل شکلا کو 26 اعشاریہ 11 قیراط کا ہیرا ریاست مدھیہ پردیش کے ضلع پنا سے ملا ہے۔ قیمتی پتھروں سے متعلق محکمے کے افسر روی پٹیل نے بتایا کہ نیلامی میں اس قیمتی پتھر کی بولی ایک کروڑ 20 لاکھ بھارتی روپے لگنے کا قوی امکان ہے۔ ان کا مزید کہنا تھا کہ یہ قیمتی پتھر دو دنوں میں نیلامی کے لیے پیش کر دیا جائے گا اور سرکاری رائلٹی اور ٹیکسز کی کٹوتی کے بعد اس سے حاصل ہونے والی رقم کان کن کو دی جائے گی۔واضح رہے سشیل شکلا لیز پر لی گئی ایک جگہ پر اینٹوں کے بھٹے کا کاروبار کرتے ہیں۔ صحافیوں سے گفتگو کے دوران کان کن کا کہنا تھا کہ وہ اور ان کا خاندان بھی گزشتہ 20 برسوں سے ہیروں کی کان کنی کا کام کر رہے تھے لیکن یہ پہلی مرتبہ ہے کہ ان کو ایک بڑا ہیرا ملا ہے۔علاوہ ازیں، سشیل شکلا نے اس امید کا اظہار کیا کہ اس ہیرے کی قیمت ایک کروڑ 20 لاکھ سے زیادہ ہوگی۔ وہ ہیرے سے حاصل ہونے والی رقم سے اپنا کاروبار شروع کرنے کا ارادہ رکھتے ہیں۔