ممبئی(این این آئی) بھارتی ہسپتالوں میں خون کے نایاب گروپ کی قلت کا سن کر بالی ووڈ اسٹار ہریتھک روشن اپنا خون عطیہ کرنے پہنچ گئے جس پر ان کے والد نے بھی داد دی۔میڈیا رپورٹ کے مطابق خون کا بی نیگیٹو گروپ نایاب مانا جاتا ہے اسی سبب ہسپتالوں کو خون کے اس گروپ کی

قلت کا سامنا کرنا پڑتا ہے۔ اس ضمن میں انسانی ہمدردی کی خاطر بھارتی اداکار ہریتھک روشن نے اپنا بی نیگیٹو بلڈ اسپتال کو عطیہ کرکے سب کے دل جیت لئے۔رپورٹ میں بتایا گیا کہ اس مثالی اقدام پر اداکار کے مداحوں سمیت والد وفلم ساز راکیش روشن نے بھی ہریتھک کی تعریف کی اور کہا ہم تم پر فخر کرتے ہیں۔بالی ووڈ اداکار نے خون عطیہ کرنے کے دوران ایک تصویر سوشل میڈیا پر شیئر کی جس میں ان کے بائیں ہاتھ پر پٹی بندھی دیکھی جاسکتی ہے اور وہ دائیں ہاتھ سے وکٹری کا نشان بنا رہے ہیں۔ہریتھک روشن کا کہنا ہے کہ میرا بلڈگروپ بی نیگیٹو ہے اور یہ خون کی نایاب قسم سمجھی جاتی ہے، اسی وجہ سے اکثر اسپتال میں اس کی قلت رہتی ہے، انسانیت سے محبت کے لیے میں نے اپنا خون عطیہ کرنے کا فیصلہ کیا۔ اداکار نے کوکیلابین اسپتال اور وہاں کے ڈاکٹروں کا شکریہ بھی ادا کیا۔اداکار کے چاہنے والے اور دیگر فلم اسٹارز بھی سوشل میڈیا پر ہریتھک کی تعریف کررہے ہیں۔

موضوعات:ہریتھک روشن