لاہور( این این آئی)ملک میں مہنگائی کا طوفان نہ تھم سکا ،رواں ہفتے مہنگائی کی شرح میں 0.22 فیصد اضافہ ہواجس سے مجموعی شرح 18.09 فیصد ہو گئی، سب سے کم آمدن والے افراد کے لیے مہنگائی 19.40 فیصد ہوگئی ۔وفاقی ادارہ شماریات نے ہفتہ وار مہنگائی کے

اعداد و شمار جاری کر دیئے جس کے مطابق حالیہ ہفتے 28 اشیا ء کی قیمتوں میں اضافہ ہوا۔پیٹرول ، ڈیزل کی قیمتوں میں اضافہ ہوا، ایک ہفتے میں لہسن 37 روپے 76 پیسے مہنگا ہوا، ٹماٹر کی قیمت میں 5 روپے 54 پیسے فی کلو اضافہ ہوا، زندہ مرغی 6 روپے 21 پیسے فی کلو مہنگی ہوئی جبکہ ماچس کی ڈبی 8 پیسے مہنگی ہوئی ۔ایک ہفتے میں گھی 3 روپے 83 پیسے مہنگا ہوا، مٹن، بیف،دال چنا، دال مسور،دودھ اور دہی بھی مہنگے ہوئے جبکہ ایک ہفتے میں 11 اشیا ء کی قیمتوں میں کمی اور 12 میں استحکام رہا ۔ادارہ شماریات کے مطابق ایک ہفتے میں پیاز 51 پیسے ،آلو 33 پیسے فی کلو سستے ہوئے، آٹے کا 20 کلو کا تھیلا3 روپے 12 پیسے، چینی 47 پیسے فی کلو، دال مونگ، دال ماش، ایل پی جی اور گڑ سستا ہوا۔