اسلام آباد (این این آئی)قیامِ پاکستان کے وقت بچھڑنے والے 2 بھائیوں کی 74 برس بعد کرتار پور میں ملاقات ہو گئی۔پاکستان کے صدیق فیصل آباد سے بھارتی پنجاب پھلے والا سے آنے والے اپنے بھائی حبیب عرف شیلا سے ملنے کرتار
پور پہنچے،پاکستانی شہری صدیق نے دور سے آتے ہوئے اپنے بھائی حبیب کو پہچان لیا۔دونوں بھائی آپس میں مل کر خوب روئے اور جھپیاں ڈالیں،74 سال کے بچھڑے ہوئے دونوں بھائیوں کی ملاقات نے دیکھنے والوں کو بھی جذباتی کر دیا۔دوسری جانب وفاقی وزیر اطلاعات و نشریات چوہدری فواد حسین نے کہا ہے کہ کرتارپور راہداری نے 75 سال سے بچھڑے دو بھائیوں کو ملا دیا، آج یہ راہداری امن، سلامتی، محبت اور عقیدت کا نشان ہے۔ اپنے ایک ٹوئٹ میں انہوں نے کہا کہ جب عمران خان نے کرتار پور کا افتتاح کیا تھا تو انہوں نے اس راہداری کو امن کی راہداری قرار دیا تھا اور آج یہ راہداری اس تلخیوں بھری سرحد پر امن، سلامتی، محبت اور عقیدت کا نشان ہے۔
