لاہور (آن لائن ) قومی کرکٹ ٹیم کے سابق کپتان شاہد آفریدی نے انکشاف کیا ہے کہ ٹی ٹونٹی ورلڈکپ میں پاک بھارت ٹاکرے سے قبل قومی ٹیم کے فاسٹ بولر شاہین شاہ
نے اْن سے ٹیلی فون پر بات کی تھی۔ نجی ٹی وی سے گفتگو کرتے ہوئے شاہد آفریدی کا کہنا تھا کہ نوجوان فاسٹ بولر نے انہیں بھارت کے خلاف مقابلے سے قبل ٹیلی فون کیا تھا۔ شاہد آفریدی کے مطابق بھارت کے خلاف پہلا میچ کھیلنے سے پہلے شاہین آفریدی نے انہیں ویڈیو کال کرکے بتایا کہ میں تھوڑا سا دباؤ محسوس کر رہا ہوں۔ شاہد آفریدی کا کہنا تھا کہ میں نے شاہین سے تقریباً 11 سے 12 منٹ بات کی، اس ویڈیو کال کے دوران میں مسلسل شاہین کو حوصلہ دیتا رہا اور کہا کہ اللہ تعالی نے تمہیں موقع دیا ہے ،اسے صحیح طرح سے استعمال کرنا۔ شاہد آفریدی نے اپنے کھیل کے دنوں کو یاد کرتے ہوئے کہا کہ پاکستانی کھلاڑی بھارت کے خلاف کھیل سے پہلے سو نہیں سکتے تھے۔ انہوں نے مزید کہا کہ دونوں ممالک کے درمیان ناخوشگوار تعلقات کے باعث ہمیشہ ہی دباؤ بہت زیادہ رہا ہے۔
