ممبئی (این این آئی)کانگریس کے سینئر رہنماء رمیش کمار کے ریاستی اسمبلی میں زیادتی سے متعلق متنازع بیان نے بھارت میں ہلچل مچادی ہے۔گزشتہ روز بھارتی ریاست کرناٹک کی اسمبلی میں کانگریس کے سینئر رہنما رمیش کمار کے اجتماعی زیادتی سے متعلق متنازع بیان پر
شدید تنقید کا نشانہ بنایا جا رہا ہے۔بھارتی میڈیا رپورٹس کے مطابق ریاستی اسمبلی کے اجلاس کے دوران سپیکر اجلاس میں بحث جلدی ختم کرنا چاہ رہے تھے جبکہ ارکان کی جانب سے مزید وقت مانگا جا رہا تھا۔ ایسے میں کانگریس کے رہنما رمیش کمار نے کھڑے ہو کر بیان دیا کہ ‘جب زیادتی کو روکنا نا ممکن ہو تو لطف اندوز ہونا چاہیے’۔ان کے اس بیان پر اسپیکر اسمبلی سمیت ارکان نے قہقہے بھی لگائے تاہم بھارتی رہنما کے اس بیان سے بھارت میں ہلچل مچ گئی۔کانگریسی رہنما کے بیان کی پارٹی کے کئی ارکان نے مذمت کی ہے اور معافی مانگنے کا مطالبہ کیا ہے۔دوسری جانب بھارتیہ جنتا پارٹی کے رہنما، اداکارہ و یونین وزیر سمرتی ایرانی نے بھی نازیبا بیان کو شرمناک قرار دیتے ہوئے کانگریس سے رمیش کمار کو پارٹی سے نکالنے کا مطالبہ کیا ہے۔اْدھر شدید تنقید کے بعد کانگریس رہنما نے اپنے بیان پر معافی مانگ لی ہے۔
