اسلام آباد (این این آئی)پاکستان مسلم لیگ (ق) کے مرکزی رہنما اور وفاقی وزیر طارق بشیر چیمہ نے کہا ہے کہ حکومت سے ناراض نہیں ہیں ، لوکل گورنمنٹ ایکٹ پر ہمارے تحفظات ہیں۔نجی ٹی وی کے مطابق پاکستان تحریک انصاف کی اتحادی سیاسی جماعت ق لیگ کے مرکزی رہنما طارق بشیر چیمہ نے کہا کہ لوکل گورنمنٹ ایکٹ کے ایک دو نکات پر ہمارے شدید تحفظات ہیں۔

انہوں نے کہا کہ اس میں کوئی شک نہیں ہے کہ ای وی ایم اس وقت قانون بن چکا ہے لیکن معاملہ الیکشن کمیشن کا ہے کہ وہ اس کے ذریعے الیکشن کراسکتے ہیں یا نہیں؟وفاقی وزیر طارق بشیر چیمہ نے واضح کیا کہ اس حوالے سے حکومتی ارکان کے ساتھ مذاکرات ہوئے ہیں اور آئندہ بھی مذاکرات ہوں گے۔ ان کا کہنا تھا کہ امید ہے کہ ساری بات وزیراعظم کے علم میں آئی ہو گی۔