نئی دہلی(این این آئی)سابق بھارتی کرکٹر سنیل گواسکر نے بابر اعظم سے متعلق عظیم پیشگوئی کرتے ہوئے کہاہے کہ بابر اعظم ایک اچھے کھلاڑی ہیں اور وہ کھیل کی صورتحال کو سمجھنے کی صلاحیت رکھتے ہیں۔
ایک انٹرویومیں بھارت کے سابق کرکٹر سنیل گواسکر نے کہا کہ بابر اعظم ایک اچھے کھلاڑی ہیں اور وہ کھیل کی صورتحال کو سمجھنے کی صلاحیت رکھتے ہیں۔انہوں نے کہا کہ بابر اعظم باؤلنگ اور بلے بازی میں جو تبدیلیاں کرتے ہیں وہ ناقابل یقین حد تک اچھی ہوتی ہیں۔سنیل گواسکر نے کہا کہ پاکستان نے زبردست کرکٹ کھیلی ہے اور تمام گروپ میچز میں کامیابی حاصل کی۔ انہوں نے کہا کہ اس وقت بابر اعظم پاکستان کرکٹ ٹیم کی قیادت کر رہے ہیں اور اس میں کوئی شک نہیں وہ خود کو فٹ اور پرعزم رکھتے ہیں۔ بابر اعظم نے اگر اسی طرح اپنی کارکردگی برقرار رکھی تو وہ عظیم کرکٹرز کی فہرست میں شامل ہو سکتے ہیں اور وہ پاکستان کے کامیاب ترین کپتانوں میں بھی شامل ہو سکتے ہیں۔سابق بھارتی کھلاڑی نے کہا کہ بابر اعظم کے پاس بہت اچھے باؤلرز ہیں جو کسی بھی کپتان کی کارکردگی کے لیے اچھا ہوتا ہے۔
