اسلام آباد (این این آئی)حکومت اور پیٹرولیم ڈیلرز ایسوسی ایشن کے معاملات طے پاگئے،حکومت نے ڈیلرز مارجن بڑھانے کیلئے کمیٹی تشکیل دیدی،پانچ نومبر کی ہڑتال کی کال بھی ڈیلرز نے واپس لیتے ہوئے ساتھ یہ بھی دھمکی دیدی
کہ وعدوں پر عمل درآمد نہ ہونے کی صورت میں بیس نومبر سے دوبارہ ہڑتال کردینگے۔وزارت پیٹرولیم میں چھ گھنٹے تک جاری رہنے والے مذاکرات میں حکومت کی طرف سے وزیر پیٹرولیم حماد اظہر،سیکرٹری پیٹرولیم ،ڈی جی آئل،چیئرمین اوگرا نے پیٹرولیم ڈیلرز ایسوسی ایشن کے وفد نے تفصیلی مذاکرات کیے۔مذاکرات میں حکومت پیٹرولیم ڈیلرز کے چھ فیصد تک ڈیلرز مارجن بڑھانے پر رضا مند ہوگئی،ڈیلرز مارجن بڑھانے کے فیصلے پر عمل درآمد کیلئے سیکرٹری پیٹرولیم کی سربراہی میں کمیٹی بھی تشکیل دیدی گئی،کمیٹی کیبنٹ اور ای سی سی سے ڈیلرز مارجن میں اضافے کی منظوری لے کر ڈیلرز کو آگاہ کرے گی،ڈیلرز ایسوسی ایشن کے عہدیدران کا کہنا تھا کہ عارضی طور پر ہڑتال کی کال واپس لے لی ہے پانچ نومبر کو اب ہڑتال نہیں ہوگی لیکن اگر حکومت نے سترہ نومبر تک اپنے وعدے پر عمل درآمد نہ کروایا تو بیس نومبر سے ملک بھر میں غیر معینہ مدت کیلئے ہڑتال کردینگے۔
