اسلام آباد ۰نیوز ڈیسک) راولپنڈی اور اسلام آباد کو ملانے والی اہم شاہراہ فیض آباد انٹرچینج کو چھ دن بعد کھولنے کا فیصلہ کرلیا گیا ہے۔ یہ اقدام مذہبی جماعت کے احتجاج کے باعث طویل بندش کے بعد کیا گیا۔انتظامیہ نے فیض آباد کی طرف جانے والے راستوں سے کنٹینرز ہٹانے کا عمل شروع کر دیا ہے، جبکہ میٹرو بس سروس کو بھی فیض احمد فیض اسٹیشن سے ائیرپورٹ تک دوبارہ بحال کر دیا گیا ہے۔
اسی کے ساتھ انتظامیہ نے ٹرانسپورٹ اڈوں، ہوٹلز، ہاسٹلز، ریسٹورینٹس اور دکانوں کو کھولنے کی ہدایت جاری کر دی ہے۔ رپورٹ کے مطابق فیض آباد مارکیٹ میں کاروباری سرگرمیاں بھی دوبارہ شروع ہو گئی ہیں۔دوسری جانب، لاہور میں بھی پانچ دن بعد اورنج لائن ٹرین، اسپیڈو بس اور میٹرو بس سروس کو بحال کر دیا گیا ہے۔تاہم شہر کے کچھ علاقے اب بھی متاثر ہیں، جہاں چوک یتیم خانہ، ملتان روڈ، بابو صابو اور اسکیم موڑ کے راستے تاحال بند ہیں، اور ان مقامات پر کنٹینرز اور خار دار تاریں بدستور موجود ہیں۔
