لاہور( این این آئی)پاکستان مسلم لیگ(ن) نے پیٹرولیم، بجلی کی قیمتوں میں اضافے اور مہنگائی کے خلاف احتجاج کرنے کا فیصلہ کرلیا ،احسن اقبال نے صوبائی تنظیموں کو احتجاج کے لئے حکمت عملی مرتب کرنے کی ہدایت کر دی ،
لیگی رکن اسمبلی مرزا جاوید کی قیادت میں پیٹرول کی قیمتوں میں ہوشربا اضافے کے خلاف اڈا پلاٹ لاہور میں انوکھا احتجاج کیا گیا ۔ تفصیلات کے مطابق مسلم لیگ (ن) کے سیکرٹری جنرل احسن اقبال نے صوبائی تنظیموںکو پیٹرولیم اور بجلی کی قیمتوںمیں اضافے اورمہنگائی کے خلاف احتجاج کے لئے حکمت عملی مرتب کرنے کی ہدایت کی ہے ۔ مسلم لیگ (ن) کے مطابق پیر کے روز قومی اسمبلی کے اجلاس میں بھی اپوزیشن جماعتوں کے ساتھ مل کر احتجاج کیا جائے گا۔ علاوہ ازیں مسلم لیگ (ن)کے رکن اسمبلی مرزا جاوید نے پیٹرول کی قیمتوںمیں اضافے کے خلاف گدھے کے اوپر احتجاجی نعروں کے کتبے لگا کر احتجاج کیا ۔رکن اسمبلی نے کہا کہ پیٹرول کی قیمت ایک سو سینتیس روپے ہونے سے عوام نہ موٹر سائیکل اورنہ ہی گاڑی چلا سکتے ہیں،عوام اب اپنی گاڑیاں فروخت کرکے گدھوں پر سفر کریں گے تاکہ پیٹرول کی بچت ہو سکے۔
