اسلام آباد (مانیٹرنگ ڈیسک/این این آئی )پاکستانی کرکٹ شائقین کیلئےبڑی خوشخبری آگئی ، ایشیا کپ کی میزبانی پاکستان کو مل گئی۔تفصیلات کے مطابق دبئی میں ایشین کرکٹ کونسل کا اجلاس ہوا جس میں طے پایا کہ 2023کا ایشیا کپ پاکستان میں ہو گا اور ایشین کرکٹ ٹیمیں پاکستان جائیں گی۔
دوسری جانب پاکستان اور بھارتی کرکٹ بورڈز کے سربراہان کے درمیان غیر رسمی ملاقات ہوگئی۔چیئرمین پاکستان کرکٹ بورڈ (پی سی بی) رمیز راجا اور صدر بھارتی کرکٹ بورڈ (بی سی سی آئی) سارو گنگولی کے درمیان غیر رسمی ملاقات ہوئی ۔ذرائع کے مطابق دونوں بورڈز کے سربراہان کے درمیان ملاقات ایشین کرکٹ کونسل ( اے سی سی ) اجلاس کی سائیڈ لائنز پر ہوئی ہیں۔ذرائع کے مطابق رمیز راجا اور سارو گنگولی نے غیر رسمی ملاقات کے دوران ایشیا ئی کرکٹ کو فروغ دینے سمیت مختلف امور پر گفتگو کی۔ذرائع کے مطابق دوران گفتگو سارو گنگولی نے رمیز راجا کو انڈین پریمئر لیگ (آئی پی ایل) کا فائنل دیکھنے کی دعوت بھی دی۔رمیز راجا نے اجلاس کے دوران بنگلادیش، سری لنکن اور ایمریٹس کرکٹ کے حکام سے بھی سائیڈ لائنز پر ملاقاتیں کی ہیں۔
