لاہور (این این آئی)پنجاب یونیورسٹی 139برس کی ہوگئی ۔ 14اکتوبر 1882ء میں قائم کی گئی پنجاب یونیورسٹی کے پہلے چانسلر سر چارلس امپفرسٹون اورپہلے وائس چانسلر سر جیمز بروڈ ووڈ لل تھے۔ پنجاب یونیورسٹی نے تین نوبل لارئیٹ پیدا کئے جن میں پروفیسر ہر گوبند کھوراناکو 1968میں فزیولوجی /میڈیسن ، پروفیسر عبدالسلام کو 1979میں فزکس اورپروفیسر سبراہمنین چندر شیکھر کو
بھی 1983میں فزکس کے مضمون میں نوبل انعام سے نوازا گیا۔پنجاب یونیورسٹی پانچ کیمپسز پر مشتمل ہے جس میں اولڈ کیمپس (علامہ اقبال کیمپس) ، نیو کیمپس (قائد اعظم کیمپس) ، خانسپور کیمپس، گوجرنوالا کیمپس اور جہلم کیمپس شامل ہیں۔پنجاب یونیورسٹی کے موجودہ چانسلر چوہدری محمد سرور اور وائس چانسلر پروفیسر نیاز احمد اختر ہیں ۔ پروفیسر نیازاحمد اختر نے جون 2018ء میں اپنے عہدے کاچارج سنبھالا تو پنجاب یونیورسٹی میں 13فیکلٹیز، 10کانسٹیٹیونٹ کالجز، 73ڈیپارٹمنٹس/سنٹرز/انسٹیٹیوٹس تھے جو کہ موجودہ دور کی تعلیمی ضروریات کے مطابق ناکافی تھے۔ پروفیسر نیاز احمد نے آئندہ پچاس سال کی ملکی ضروریات کو مد نظر رکھتے ہوئے تمام فیکلٹیوں اور شعبہ جات کے ڈھانچے کو جدید دور کی تعلیمی و تحقیقی ضروریات کے مطابق ڈھالنے کے لئے کام شروع کیاجس کے نتیجہ میں آج پنجاب یونیورسٹی میں 19 فیکلٹیاں قائم ہو چکی ہیں جبکہ شعبہ جات اور سنٹرز کی تعداد 135سے زائد ہے ۔وائس چانسلر پروفیسر نیاز احمد کی جانب سے یونیورسٹی کی عالمی رینکنگ میںا ضافے اور ریسرچ کلچر کے فروغ کے لئے متعدد اقدامات کے نتیجے میں گزشتہ تین سال میں بین الاقوامی رینکنگ میں 16 فیصد ترقی ہوئی اور پنجاب یونیورسٹی کی تاریخ میںپہلی مرتبہ 13مضامین کو عالمی رینکنگ میں شمار کیا گیا ۔ پنجاب یونیورسٹی کا شعبہ کیمیکل اینڈ پٹرولیم انجینئرنگ کیو ایس رینکنگ میں دنیا کے بہترین 100سے 150اداروں میں شامل ہوا۔کیو ایس ورلڈ یونیورسٹیز رینکنگ میں ایشین رینکنگ میں پنجاب یونیورسٹی نے صرف دوسال کے قلیل عرصے میں 54پوائنٹس بہتر ی کے ساتھ 178ویں پوزیشن حاصل کی جبکہ نیچر پبلشنگ نے نیچرل سائنسز میں جامعہ پنجاب کوپاکستان میں نمبر 1 قرار دیا۔ واضح رہے کہ1869 کو قائم ہونے والا نیچر پبلشنگ گروپ مکملن پبلشرز لمیٹیڈ کا حصہ ہے جو کہ برطانیہ میں 1843 میں قائم ہوا اور اس گروپ کے تحت اعلیٰ ترین بین الاقوامی معیار کے سائنسی تحقیقی جرائد شائع کئے جاتے ہیں ۔پنجاب یونیورسٹی کی 139ویں سالگرہ کے موقع پر پرووائس چانسلر پروفیسر ڈاکٹر محمد سلیم مظہر، رجسٹرار ڈاکٹر محمد خالد خان ، اساتذہ اور ملازمین نے وائس چانسلر پروفیسر نیازاحمد کو مبارک باد پیش کی ہے اور یونیورسٹی کی ترقی میں کردار کو سراہا۔ اپنے پیغام میں وائس چانسلر پروفیسر نیازاحمد نے یونیورسٹی کے اساتذہ، طلباء اور ریسرچ سکالرز کونصیحت کی کہ وہ ملک کو درپیش مسائل کا سد باب کرنے کیلئے عملی تحقیق پر زوردیں۔
