لاہور (این این آئی)نیشنل ٹی ٹوئنٹی کپ میں عمدہ کارکردگی دکھانے والے شعیب ملک، فخر زمان اور شاہ نواز دھانی کی ٹی ٹوئنٹی ورلڈ کپ اسکواڈ میں شمولیت کا امکان پیدا ہو گیا۔

ٹی ٹوئنٹی ورلڈ کپ اسکواڈ میں کون کون شامل ہوگا، جوسلیکٹ ہیں وہ کھیلیں گے یا نہیں، جو ریجیکٹ ہیں وہ سلیکٹ ہوں گے یا نہیں؟ ٹی 20 ورلڈ کپ کے آغاز سے 17 روز پہلے منتخب اسکواڈ میں تبدیلیوں کا امکان ہے۔نیشنل ٹی ٹوئنٹی کپ میں کھلاڑیوں کی ناقص کارکردگی تبدیلیوں کی بڑی وجہ بن رہی ہے۔ٹی ٹوئنٹی ورلڈ کپ اسکواڈ میں شامل اعظم خان، محمد حسنین اور صہیب مقصود کے ستارے گردش میں ہیں اور ان کے قومی اسکواڈ سے آئوٹ ہونے کا امکان ہے۔دوسری جانب شعیب ملک، فخر زمان اور شاہ نواز دھانی پر قسمت کی دیوی مہربان ہو گئی ہے، ان کھلاڑیوں کی قومی اسکواڈ میں انٹری متوقع ہے۔گزشتہ روز چیف سلیکٹر محمد وسیم نے ورلڈ کپ اسکواڈ سے ملاقات میں کھلاڑیوں کو قومی ٹی ٹوئنٹی کپ کھل کر کھیلنے کا مشورہ دیا تھا۔انہوں نے کپتان بابر اعظم اور سلیکٹرز سے بھی مشاورت کی تھی۔