لاہور( این این آئی)تحریک انصاف کے سینیٹ میںپارلیمانی لیڈر وسطی پنجاب کے صدر سینیٹر اعجازاحمدچوہدری نے کہا کہ تحریک انصاف کی حکومت عوام کے بنیادی مسائل حل ہونے تک چین سے نہیں بیٹھے گی، ماضی کی حکومتوں کی توجہ صرف لوٹ مار پر رہی،
زرداری اور شریف خاندانوں نے ملکی وسائل کو بے دردی سے لوٹا، پی ٹی آئی کی حکومت عوام کے مسائل کے حل کے لئے ہمہ وقت کوشاں ہے، کینٹ کی عوام تحریک انصاف کے ساتھ ہیں، چوروں اور لٹیروں کو کنٹونمنٹ بورڈ کے انتخابات میں عبرتناک شکست ہوگی۔ ان خیالات کا اظہار انہوں نے پی ٹی آئی کے نامزد امیدوار چوہدری شاہد اقبال کی انتخابی مہم کے موقع پر خطاب کرتے ہوئے کیا۔ اس موقع پر آزاد امیدواران رانا جاوید شاہین اور رانا فہیم عرف بلانے ساتھیوں سمیت تحریک انصاف میں شمولیت اور چوہدری شاہداقبال کے حق میں دستبردار ہونے کا اعلان کیا۔ اس موقع پر ہمایوں اخترخان، رانا محمد تنویر، رانا اقبال، رانا عابد، رانا امان اللہ اور دیگر بھی موجود تھے۔اعجازچوہدری نے کہا کہ پارٹی میں نئے شامل ہونے والے ساتھیوں کوخوش آمدید کہتا ہوں، پی ٹی آئی کنٹونمنٹ بورڈ کے انتخابات میں بھرپور کامیابی حاصل کرے گی، کینٹ کی باشعور عوام 12 ستمبر کو تبدیلی کے لئے گھروں سے باہر نکلیں اور (ن) لیگ کے بہروپی ٹولے کو شکست فاش دیں، میں نے خواجہ سعد رفیق کوچیلنج کیا تھاکہ اپنی دولت کا دس فیصد حصہ عوام میں تقسیم کردیں تو میں اپنی ساری دولت عوام میں تقسیم کردوں گا ۔
